The Punch boxing-ah Mizo mipa boxer pathum chak

Mizo boxer lar NT Lalbiakkima chuan rei tak ring chhung a rah tawh loh hnuah Inrinni zan khan professional fight a hmachhawn leh ta a, round khatna lekah Thai boxer Kittipong Jareonroy chu technical knockout hmangin a hneh - light flyweight inhnekah hian hnehna chang turin hun a mamawh rei lo. Mizo mipa boxer dang F Zoramchhana leh Omega Lalramdina ten hnehna an chang bawk.

Lalit Great Eastern, Kolkata-a inhnekah NT-a hian hnehna chang turin minute 2:49 bak hun a mamawh lo a, Siaha tlangval hi a thlan a tla hman meuh lo a ni ber - Mizo boxing ngainatuten NT-a inhnek tam zawk hmuh zel an duh ang.

Zo Keite hminglem an pek NT-a hian professional fight vawi ruk a hmachhawnna a ni ta a, vawi nga a khingpuite knockout in, vawi khat a tlawm thung - IBA Intercontinental title kawltu hian khawvel huapa title langsar zawk hnekchhuah ngei tumin ṭan a khawh thar mek.

Mizo boxer beiseiawm zinga mi F Zoramchhana pawh Inrinni zanah hian a inlan ve bawk a, Rajasthan boxer Pankaj Kumar chu round khatnaah technical knockout hmangin a hneh ve bawk - super bantamweight-a inlan Zotea hian a professional career-ah vawi ruk hnehna chang tawhin, vawi thum a tlawm tawh thung.

Hetihlai hian a vawi hnih nana professional fight-a hmachhawnnaah Omega Lalramdina pawhin hnehna a chang a, Gugan Kumar chu unanimous Decision (59-56, 59-56, 60-54) in a hneh a ni.

Mizo hmeichhe zinga professional boxer hmasa ber MC Vankimmawii erawh a fight hmasa berah a beisei ang result a hmu lo a, Haryana nula Gargi Chahal chu unanimous Decision (39-37, 39-37, 39-37) in a ngam lo - hetah hian tawp mai erawh a tum lo ang.

The Punch 10-ah hian Mizo boxer pali bakah referee & judge hna thawkin Malsawmsanga leh Chawnghmingmuana te chu an kal ve bawk a ni.