Sawisel hlawh takin Usyk a chak

Ukrainian boxer rothap Oleksandr Usyk chuan sawisel hlawh takin Daniel Dubois chu nimin khan a hneh a, a kawnghren kawl lai WBA (Super), IBF, WBO leh IBO world heavyweight title te kawl chhunzawm mah se ṭum dang anga hawi 'champ' theih erawh a ni lo.

Usyk hian round kuanaah technical knockout hmangin Dubois hi a hneh a, mahse, hemi hma round nganaah Dubois chuan Usyk hi a kawng bawrah a hnek fuh - Usyk hi na ti takin a tlu a, mahse, referee chuan 'low blow' a ni, tiin Usyk hi insiamremna hun a pe.

Dubois chuan hei hi 'low blow' ah a ngai lo thung a, kum 25 mi boxer chuan, "Ka ngaihdanah chuan kha kha low blow a ni lo a, a hnekna turah tak ka hnek," a ti a, dawt hmanga hnehna chang lo ang hialah a inngaih thu a sawi bawk.

Fight hmuhnawm chu

Stadion Wrocław, Poland-a inhnekah boxer ṭha zawk leh tawnhriat nei ṭha zawk Usyk-a'n a tir lamah inhnek a thunun zawk a, a che vel a hmuhnawmin, vawi 20 inhnek a hmachhawn tawha vawi khat chiah la tlawm Dubois pawhin tihngaihna vak a hre meuh lo.

Kum 25 mi Dubois hian second round-ah uppercut hmangin Usyk hnek fuh ve mah se, Ukrainian boxer hi rang zetin a insiamrem a, round nganaa thil thleng erawh khawvel mak tih a ni - Dubois hian Usyk hi a kawngah a hnek fuh.

Ring chhuatah na ti takin Usyk a ṭhu hnawk a, boxer pahnih inhnek en tura pungkhawm fans 40,000-ten mak tiin an thlir - mahse, Usyk a vannei. Referee-in 'low blow' tia a sawi avangin Ukrainian boxer hi insiamremna hun pek a ni.

A tawpah Usyk

Minute thum leh second 45 zet Usyk-a'n chawlh hahdam nana hun a hman hnuah inhnek chhunzawm a ni a, Ukrainian boxer a fimkhur sawt a, a tawnhriat neih ṭhatna chhawr ṭangkaiin hlauhawm taka chet a duh lo.

Round riatna a thlen meuh chuan Usyk hian inhnek a thunun leh tawh a, vawi tam Dubois a hnek fuh hnuah British boxer a ding reng thei lo - a tlu a, mipui thawm chu ring tak a ni.

Round riatnaah hian Dubois hi huaisen takin tho leh mah se, round kuanaah Usyk hian a kut dinglamin chiang zetin a deng fuh leh a, a zawna Anthony Joshua a hneh hnua a fight hmasa berah Usyk a chak leh ta.

A 'fair' lo?

Boxing danah, kawng hnuai lama inhnek chu 'low blow' tih a ni a, phal a ni lo - replay-a a lan danin Dubois hian a kawngah a hnek fuh niin a lang a, low blow-a chhiar loh tur ni awm tak a ni.

Dubois promoter Frank Warren chuan referee Luis Pabon chu na taka sawiselin, Usyk duhsakah a puh a, result chu ngaihtuah ṭhat tura thuneitu sang lama a thlen tur thu a sawi bawk.

Warren chuan, "Usyk hi ka duh chi tak a ni. Mahse, vawiin inhnekah kha chuan inhnek chhunzawm turin theihna a nei lo a, chutichung chuan insiamrem turin hun rei tawk tak an pek belh a ni," a ti a, referee thutluknaah a lungawi lo.