Chawlh zai rel lo Bellingham - goal a khung leh ta!

Real Madrid an chak a, goal khungtu chu Jude Bellingham bawk a ni. Zirtawpni zan khan Real hian an mikhualna ramah Celta Vigo chu 1-0 in an hneh a, inkhela goal awmchhun hi Jude Bellingham khung a ni.

Real-in league match thum an khelhah hnehna an la chang vek a, season bul an ṭan danah sawisel tur a awm lo. Nizan khan Real elpui ber Barcelona an inlan a, he thu buatsaih a nih lai hian result kan hre hman lo - zanin dar 1:00 hian Atletico Madrid an inlan ve dawn thung.

Carlo Ancelotti enkawl Real hian an league match hmasa berah Athletic Bilbao chu 2-0 a hnehin, match hnihnaah 3-1 in Almeria an hneh bawk a, tunah 1-0 in Celta Vigo an hneh leh ta.

Real tan goalkeeper chhuanvawr Thibaut Courtois inhliam vanga an lakluh Kepa Arrizabalaga chuan a match hmasa ber khelin, a clean sheet nghal a, Real tan lawmna belhchhahtu a ni.

A harsa

Real Madrid boss hlui Rafael Benítez enkawlna hnuaiah Celta-in beisei angin season bul an ṭan lo a, an match hmasa berah Osasuna chu 2-0 in an hneh lo - match hnihnaah insiamṭhain, team ṭha Real Sociedad chu 1-1 in an inhnehtawkpui thung.

Zirtawpni zanah pawh Real mikhual mah se, point hlawh ngei tumin theihtawp an chhuah a, an vannei teuh hle. Celta hian minute thumna lekah Jorgen Strand Larsen hmangin goal hmahruai an khungah an inngai hman hial.

Mahse, Norwegian striker hi goal a khungna kawngah keeper Kepa lakah a foul niin a lang a, video assistant referee (VAR) a inrawlh hnuah goal hi pawmsak a ni lo - Real an vannei takzet.

Goal lut loin chawlhlawk hman a ni a, Real-in Celta khelmualah beisei an phak lo. Real buaina belhchhah turin forward ṭha mi Vinícius Júnior chu minute 18-na lekah lakchhuah a ngai a, Espanyol aṭanga loan-a an hawh Joselu a tlan lut.

Hey Jude!

Minute 68-naah Real-in an chance neih an chhawr lo zui a, penalty an hlah! Celta keeper Ivan Villar chuan penalty area-a Rodrygo a tihtluk avangin penalty a chawi. Mahse, Brazilian forward Rodrygo-a'n a penalty hlawhchhuah a chhuih lut thei lo. Carlo Ancelotti-a'n penalty pet tur hian Luka Modric a ruat lawk a, Rodrygo-a'n a pet ta daih hi mak a ti. Chutihrualin Brazilian forward-in a pet chhan hi Modric-a'n a ken vang niin inkhelh banah Ancelotti hian a sawi.

Real-in an vanduai zan an tawng mai dawn emaw tih a awl a, mahse, an beidawng duh bik lo. Hun tawp nan minute kua chauh a awm tawh tihah vanneihna an tawng ta nge nge a, Joselu siamsak chu Bellingham chuan goal-ah a chantir.

Hun tawp thlengin goal dang a lut lo a, Real an chak zui - pound maktaduai 115 thlenga man sang chho thei tura Spanish club zawmtu Bellingham-a'n Real tan league match thum khelin goal li a khung ta a, assist vawi khat a nei bawk.