Mbappe hoin PSG an chak

Kylian Mbappe chuan a zia tak tak a chhuah leh ta a, goal khung thiam leh player ṭha bik a nihna a lantir leh ta. Inrinni zan Ligue 1 inkhelah goal hnih khungin Paris Saint Germain chu Lens lakah 3-1 in a chakpui.

PSG tan Marco Asensio chuan goal hmahruai a khung a, a hnuah France captain hian goal hnih a belhchhah. Paris khawpuia inkhelah, mikhual tan hun tawp dawna Morgan Guilavogui goal khungin awmzia a nei phak lo.

Club nen buaina an neih avangin Mbappe hi an league match hmasa berah a inlan lo a, team training pawh a zawm lo. Mahse, club thuneitu lam nen inberemin, an match hnihna aṭangin a inlan ṭan.

Toulouse nen an inkhelh ṭumin bench aṭangin a lut a, goal a khung nghal. Tun ṭumah chuan inkhel bul ṭantu zingah a tel tawh a, a hna pangngai a thawk - Asensio leh Ousmane Dembele te nen an inkawp hi an hmuhnawm dawn.

Mbappe hian PSG tana goal khung hnem ber record a chelh chu a sawhnghet zel a, league match bikah chauh pawh goal 151 a khung tawh, amah hnaih bertu Edinson Cavani (138) a kalsan thui ta hle.

PSG coach Luis Enrique chuan, "Tun ṭum ka naute inkhel chuan min tilawm hle. Club tan theihtawp an chhuah a, ka laka rinna nghat tak tak an nihna ka hmu bawk, a ṭha ber ni tur erawhin hun kan la mamawh.

"Goal kan neih hnuah pawh khung belh chaka kan la tuihal rengte khan min tilawm. Lens hi team fing leh inveng thiam tak an ni a, anni laka kan khelh dan hi a lungawi thlak," tiin a sawi.