Leipzig tan Simons leh Openda

Bundesliga club RB Leipzig-in season liam taa an player pawimawh Dominik Szoboszlai leh Christopher Nkunku te chu Liverpool leh Chelsea lakah an chân a, German club hian player pawimawh chhuah mah se player pahnih thlakna atana lakluh Xavi Simons leh Lois Openda te an che ṭha nghal.

Leipzig hian Zirtawpni zan khan VfB Stuttgart an mikhual a, Red Bull Arena-ah 5-1 in an chak. Mualneitu tan hian Benjamin Henrichs, Dani Olmo, Lois Openda, Kevin Kampl leh Xavi Simons ten goal khat ṭheuh an khung.

Hmabak nei êng Simons hian Paris Saint-Germain aṭangin loan hmangin Leipzig hi a pan a, goal a khung bakah assist vawi hnih a nei. Barcelona academy chhuak Simons hi kum 20 mi chauh a la ni. Lens aṭanga a ngheta Leipzig zawmtu Openda pawhin goal ṭha tak a khung ve bawk.

Leipzig hian DfL Supercup-ah Bayern Munich an hneh a, chutihrualin Bundesliga match hmasa berah Bayer Leverkusen lakah an tlawm. Nipui bazarah defender pawimawh Josko Gvardiol an chân a, Stuttgart lakah goal nga khung thei mah se goal khat an chhuah tho avangin han fak chiam a la rem rih lo.

Bundesliga inkhel dangah Borussia Dortmund leh Bochum te 1-1 in an inhnehtawk. Dortmund hi a suttu zawk an ni a, Donyell Malen hmangin second half-ah siphurh an sut. Edin Terzic hote hian season liam ta khan Bundesliga champion-na hun ṭha an bawhpelh a, tun season-ah pawh anni aia sum seng huai zawk leh club lian zawk Bayern nomawi chhuhsak hi a harsa dawn.