East Bengal leh Goa an chak

Durand Cup khelh mekah semifinal lut tur chinfel a ni ta a, nizan lama Mumbai City leh Mohun Bagan te inkhel erawh result kan hre hman lo - NorthEast United, East Bengal leh FC Goa te chuan semifinal an lut tawh.

Ningani zana Highlander-in semifinal an luh hnuah, Zirtawpni zan khan East Bengal an inlan ve leh a, Kolkata club hian I League club ṭha Gokulam Kerala chu 2-1 a hnehin semifinal an lut.

East Bengal hian goal khung turin hun an mamawh rei lo hle - Jordan Elsey chuan minute khatna lekah goal hmahruai a khung nghal a, mahse, Gokulam hian Aminou Bouba hmangin minute 57-naah an chhanglet.

Mahse, Gokulam tan si phurh suttu Aminou Bouba a chesual zui a, minute 80-naah Nishu Kumar-a cross aṭanga ball kal chu an lamah a tilut palh - Kerala club an tho leh tawh lo a, 2-1 a tlawmin Durand Cup an mangṭha.

Inrinni zan quarterfinal inkhel dangah FC Goa chuan 4-1 ngawtin Chennaiyin an sawp thung. Indira Gandhi Athletic Stadium, Guwahati-a inkhelah Bikash Yumnam chuan minute ngana lekah Chennai club tan goal hmahruai a khung a, mahse, FC Goa chhaih kawlhna goal mai a ni.

Mahse, Goan club tan player thar Carl McHugh chuan a club thar tana a match hmasa berah si phurh sutna goal a khung a, Carlos Martinez, Noah Sadaoui leh Victor Rodriguez ten goal khat ṭheuh khung lehin, 4-1 in FC Goa an chak.

Durand Cup semifinal hi August 29 leh August 31-ah khelh tur a ni a, NorthEast United leh East Bengal intawng hmasain, August 31 zanah FC Goa leh nizana Mumbai City leh Mohun Bagan inkhela chak zawk an intawng dawn a ni.