Aw thawhlehna ni ropui - Newcastle hnehtu!

Liverpool-in minute 62 zet chu player 10-in an khel a, si khat an phur bawk. Liverpool khelhna hmun hi St James' Park a ni a, an hmachhawn hi tun hnaia hmasawn tak Newcastle United an ni.

A tawi zawnga sawi chuan team tam zawk chu Liverpool dinhmunah hian ding se, an beidawng ang. Mahse, Liverpool kha an ni miau a, an beidawng ve lo - a tawpah 2-1 in an chak a, hnehna hlado an chham haw!

Magpies hian Anthony Gordon hmangin minute 25-naah goal hmahruai an khung a, minute thum hnuah Liverpool captain Virgil van Dijk hnawhchhuah a ni bawk - a beidawnthlak a, a manganthlak bawk.

Mahse, Reds-in tha thlah loin an bei a, bench aṭanga luhtir Darwin Nunez chuan minute 80 hnu lamah goal hnih rawn khungin, Liverpool chu 2-1 in hnehna a chanpui - thawnthu ngaihnawm chu hnutchhiahin a awm leh ta.

Fiahna hautak

Liverpool-in season bul ṭan nan Chelsea an draw a, Bournemouth an hneh zui - Reds tan khualmuala team ṭha Magpies lenchilh hi, season hmasa mangchhia aṭanga an harh leh harh loh fiahna remchang leh ṭha a ni.

Chutiang bawkin Newcastle thawnthu a danglam lo. Eddie Howe-a team-te hi Premier League club lian zinga chhiar tel theih tura indin chho mek an ni a, Manchester City laka an tlawm hnua Liverpool mikhual hi an tan fiahna a tling.

A tirah Magpies hian fiahna an paltlang ngei dawn niin a lang. Minute 25-na lekah Mohamed Salah-a back pass chu Trent Alexander-Arnold-a'n a dang ṭhelh a, Gordon chuan hei hi chak taka tlanpuiin, Alisson-a goal venah a chhuih lut.

Everton chher hriam Gordon ber kherin an lama goal a khung hi Reds tan a na a, an hliama chi phul belh turin VVD chuan minute thum hnuah red card a hmu bawk - Alexander Isak laka a foul vang a ni.

Mangchhia

Liverpool fan-ten mangchhia an mang a ni ber a, inkhel hmuhnawm tak ni tura beiseiah khan minute 30 pawh a tlin hmain an zawr a, si phur chunga player kim loa khel Liverpool tan beisei tur a tlem.

Liverpool manganna belhchhah turin Miguel Almiron a hlauhawm takzet a, Reds si ban nghak tura ding kha Alisson kher ni lo se Merseyside club-in goal tam zawk an chhuah hial ang!

Brazilian keeper hian Almiron-a khung ngei tur nia lang chu mak tak maiin a dang a, a per lehlam hian 'goal frame' a per - hei chu save ropui bik huanga dah tlak a ni a, chutiang dahna museum a awm a nih chuan dah nghal ru!

Almiron hian chawlhlawk hman a nih hnuah pawh Magpies tan chance duhawm a nei leh a, mahse, post a pet per. Harvey Barnes pawhin ven loha awm Callum Wilson pe thei reng mah se mahni hmasial a thlang a, a tifuh lo - Liverpool an vannei a, fan-ten hlauhthawngin inkhel an thlir reng thung.

Thawhlehna chu

Mahse, football mawina chu beisei loh thil a thleng fo hi a ni a, beiseina zuai tawhten beiseina thar an nei leh ṭhin hi a ni - Pathianni zanah pawh football mawina hmuhtirin kan awm a, Reds an tho.

Jurgen Klopp-a'n Diogo Jota leh Darwin Nunez a luhtir hnuah Liverpool game-in awmzia a nei ṭan a, Magpies tlarhnung an rum ṭhaih ve ṭan. Minute 81-naah Jota ball pet chuan Magpies defender Sven Botman a per.

A per lehlam hi Nunez chuan um lutin, goal-ah a chantir a, chak lo tura ngaih Liverpool-in point khat an hlawh chhuak. Mahse, Reds hian point khat nen chauha haw an lo tum reng reng lo.

Hun pek belh minute thumnaah Salah ball pek ṭha zet chu Nunez chuan goal-ah a chantir leh a, season hmasaa beisei phak lo striker hian hun pek a nih phawt chuan theihna sang tak a nei reng tih a pholang nawn - a tawpah Liverpool an chak daih!

Barcelona nena Champions League-a kan intawn ṭum ai khan a harsa zawk hial ang. Bul kan ṭan ṭha lo a, goal kan chhuah a, red card kan hmu bawk. Mahse, kan insiamrem a, chawlhlawk lai khan kan ti thei a ni, tih hi ka rilruah chuan a awm daih tawh. Vanneihna kan mamawh hran lo a, kan thawhrah a ni. Nunez a khel ṭha takzet - game kha kan thuhnuaiah kan dah a, Darwin luhtir zuiin, bul a ṭan loh vanga a tha za êm êm kha a rawn puak keh ta a ni.

Virgil van Dijk-a red card hmuhna kha chu mak ve tak chu a ni. Ball chan tumin a tlan a, an intawk lawi ve a ni mai. Khatiang kha red card turah ka ngai lo a, kan la en leh ang chu. Mahse, vawiinah chuan kha thil thleng khan thil ropui zawk titurin min chher hriam a, ka nauten theihtawp chhuahin an bei a ni.
- Jurgen Klopp, Liverpool manager

=========================

Thil ṭha tam tak zirchhuah tur a awm. Game kha hma taka titawp thei tur kan ni a, kan ti ta si lo. Chance tam tak kan nei a, mahse, Alisson-a'n Almiron-a pet a dante kha live-a inkhel ka en tawhah chuan save ropui ber pawl a ni hial ang chu. Liverpool khan bench aṭangin world class player-te an la luhtir thei a, an hlauhawm êm êm - counter attacking-ah an ṭha êm êm bawk si.

Football chu hetiang mai hi a nih chang a awm ve bawk. Khatianga game hloh kha kan tum a ni bik lo a, mahse, Liverpool khan an kim loh chiah khan min din hnaih a, kan tan hmun awl zawn a hara lutuk. Chawlhlawkah khan goal dang khung tum leh turin kan infuih a, chance pawh insiam mah ila, a tawp kan khar thei tlat lo. Thil thleng pakhat chauh hi kan tan a pawi thei a, chu thil chu a thleng miau bawk si a ni.
- Eddie Howe, Newcastle United boss