Chanmari FC-in T. Mawia an la lut

Mizo club ṭha Chanmari FC chuan a vawi thum nan Mizoram Premier League nomawi chawi ngei an tum tih an lantir a, goalkeeper tawnhriat nei ṭha Zothanmawia (T. Mawia), College Veng chu Gokulam Kerala aṭangin an la lut.

Chanmari FC manager C. Lalthanmawia (Mawitea) chuan, "Goalkeeper ṭha T. Mawia kan la lut thei hi kan lawm a, kan mamawh tak a ni. Kan champion thei ang em, tih chu ka sawi thei lo a, amaherawhchu tuna kan squad neihah hian kan lungawi hle," tiin Vanglaini a hrilh.

I Day Football-ah khan Chanmari FC hian match li aṭangin goal riat an chhuah a, MPL10-ah match khat lek an la khel nachungin goal thum an chhuah tawh. K. Malsawmkima hoten goalkeeper ṭha bik an chang thei hi an vannei hle.

T. Mawia hian MPL hmasa berah khan Dinthar FC a champion pui a, MPL-ah vawi li champion tawhin Dinthar FC hnu hian Aizawl FC vawi hnih a champion pui a, Chhinga Veng a champion pui leh bawk. Chhingcows a champion pui ṭum hian best goalkeeper-a thlan a ni.

Aizawl FC-in I League an champion khan T. Mawia hi a tel a, National Games-a Mizoramin gold medal an lak ṭum khan player pawimawh a ni. Chhinga Veng aṭangin Mohammedan Sporting Club a pan a, Kolakta club hi Calcutta Football League-ah vawi hnih champion puiiin I League leh Durand Cup-ah pahnihna a nihpui ve ve bawk.

Tun nipui bazarah T. Mawia hian Gokulam Kerala a pan a, Durand Cup-ah vawi thum a inlan hman. Chanmari FC a zawm dawn avangin Kerala club hian a contract an tihtawpsak. Chutihrualin season hnih chhung chu ISL leh I League club a zawm erawh a rem lo - Gokulam-ah erawh a kir leh thei thung.

Chanmari hian T. Mawia an lak hma hian phai lama tawnhriat nei ṭha Lalkhawpuimawia (Mapuia), R. Laldanmawia leh Lalramchullova te an la lut tawh. Hyderabad reserves aṭangin Sialhawk midfielder Crespo Vanlalhriatpuia an la lut bawk. Mala hote hian September 1, Zirtawpni hian Project Veng FC an hmachhawn dawn a, T. Mawia hi inlan thei tura beisei a ni.