Thailand tana sulsutu Vitidsarn

Badminton World Championship 2023 khelh zawh taka mipa inelna huangah Kunlavut Vitidsarn a champion a, an ram Thailand aṭangin khawvel huap inelna lianah hian mipa champion thei hmasa ber a ni.

Season hmasa khan Vitidsarn hian final a lut tawh a, mahse a chak lo zawkah a ṭang. Kuminah erawh Naraoka Kodai nen darkar khat leh minute 58 zet an inkhelh hnuah 19-21, 21-18, 21-7 in a vannei zawkah a ṭang.

Junior huangah world champion a lo ni tawh a, tunah senior huangah a hlawhtling leh ta chiah - hetiang tithei player parukna a ni nghal. Vitidsarn chuan, "Ka tan chuan ni chhinchhiah tlak bik a ni chiang hle.

"Tun hi a tawpna ni loin a bul ṭanna a nih hram ka beisei," a ti. Kum 22 mi chauh a la ni a, tunah hian world number 3 a ni mek, hliam leh harsatna dangin a tlakbuak a nih loh chuan hmabak êng tak a nei mek.

Hmeichhe inelna lamah pawh An Se-young chuan mellung thar a phun. South Korean nula zingah An Se-young hi BWF World Championship-a gold medal la thei hmasa ber a ni.

Season kal laiah An Se-young hi a che ṭha takzet a, kuminah tournament 12 a hmachhawn zingah 11 tehmeuhah final a lut, nomawi inchuhna inkhelah hian world number 1 hlui Carolina Marin chu 21-12, 21-10 in a hneh.