Gold medal latu Neeraj Chopra

India fapa rangkachak Neeraj Chopra chuan sulhnu ropui a nei leh ta. World Athletics Championship-a fei khawh (javelin) huangah gold medal a khawh chhuak leh ta.

Chopra hian Olympic-ah India tan athletic huanga goal medal la hmasa ber record a lo siam tawh, tunah chuan World Athletics Championship-a pakhatna ni thei hmasa ber a ni leh ta a ni.

National Athletics Centre, Budapest, Hungary-a inelna neihah Pathianni zan khan kum 25 mi Chopra hian a khawh vawi hnihnaah 88.17m a thui a khawh a, hei hi pakhatna nih nan a tawk.

India tlangval chhuanvawr hnungah hian Pakistan mi Arshad Nadeem a awm a, ani hian 87.82m a thui a khawh thung a, infiamna a hmachhawn tawh zinga a chet ṭhat ber ṭum tawng mah se Chopra a tluk ta lo.

Diamond League champion pawh lo ni tawh Chopra chuan, "Inelna ka hmachhawn dawn apiang hian ka thlen chin tur ka suangtuah lawk ṭhin a, chumi tihlawhtling tur chuan ka rilru pawh ka sawrbing ṭhin.

"A bik takin World Athletics Championship atan hi chuan rilru ka pe nasa hle, a chhan chu kum tina hmachhawn theih a ni lo a, vanduai phei chuan rei tak nghah ngai a ni thei, chuvangin 100% a rilru pek a ngai.

"Theihtawp tak meuhin taksa lam ka inbuatsaih a, chu mai bakah chuan rilru thlengin ka inbuatsaih bawk. Tuna hlawhtlinna hi ka tan chauh a ni lo, kan ram India tana medal ka la thei hi ka lawm," a ti.

World Athletics Championship-ah hian kum 2003 khan Paris khawpuiah Anju Bobby George-i chuan hmeichhe long jump huangah bronze medal a lo la tawh, ani bakah chuan athletics huangah Chopra chiah hi medal la thei a la ni hial.

Tun ṭumah hian Chopra hian final round lut turin 88.77m a thui a khawh a, a khawh thui ber ṭum a ni hial. Gold medal inchuhna round-ah tluk ta chiah lo mah se, a elpui dangte aiin a la khawh thui tho a ni.

Chopra chuan, "Tun inelna neihah hian a ṭha leh thiam ber ka ni hauh lo, chuvangin hmasawn ka la mamawh. Theih ni se la chuan 90m aia thui khawh theih ka duh a, chumi atan chuan ka bei chhunzawm ang," a ti, duhtawk a la tum lo.

Haryana tlangval chuan sawi zawmin, "Inelna kan neih hun kha India ram aṭang chuan zanrei tawh tak a ni a, khatiang hunah pawh kan ram mipui ten ṭha taka min lo thlawp avangin lawmthu ka sawi, medal hi India mipuite tan a ni.

"Tunah chuan Olympic leh World champion ka ni ta, keimah ang bawk hian India mipui dangte pawhin mahni hna ṭheuhah theihtawp kan chhuah a nih chuan hlawhtlinna a awm, kan ram hi dinhmun duhawm takah kan dah thei a ni," tiin a sawi.

Commonwealth Games 2022-ah khan tun ṭuma pahnihna ni ta Nadeem hi a champion a, tun inelna neihah pawh hian rinkai a ni, mahse a fei khawh ho zawng zawngah Chopra a elphak lo.