Man City chhanchhuaktu Rodri

Manchester City-in Pathianni zan khan Bramall Lane-ah Sheffield United an hmachhawn a, Erling Haaland-a goal hmangin chak turah inngai mah se mualneitu lamin Jayden Bogle hmangin minute 85-naah an sut. Cityzens-in chhanchhuaktu an mamawh a, a hunah tak rawn pen chhuak chu Rodri a ni - Spanish midfielder hian minute 88-naah chakna goal a khung.

Premier League-ah match thum khelh a ni tawh a, match thuma chak vek chu champion lai Man City chauh an awm. Blades laka hnehna an chan ṭum hian manager Pep Guardiola chu a hnung an zai avangin a awm lo a, assistant manager Juan Manuel Lillo-a'n team a ho a ni.

Record siam tur Haaland

City hi Pep-a'n a ho thei lo ringawt a ni lo a, Kevin de Bruyne tel loa khelh dan an zir mek. Argentine forward Julián Álvarez-a'n no. 10 hna a chelh a, theihna sang tak nei mah se KDB hmun ruak erawh a hnawh khat zo rih lo.

Sheffield United lakah City hian inkhel an thunun nachungin goal chance siam an harsat a, chutihrualin box chhungah ball-in centre back John Egan kut a per avangin penalty an hmu. Haaland-a'n keeper bum mah se goal ban a pet per.

City hian inkhel an thunun a, goal hlauhawm tak nei lo mah se vawi 12 ngawt shot an nei a, ball pawh 83% ngawt an chang. Blades tlarhnung an inrem phui ṭha a, City-in goal an khung lo.

Second half-ah City-in an nawr chhunzawm a, Blades pawh an ṭang reng thei ta lo. Minute 63-naah Jack Grealish-a cross duhthusam chu Haaland-a'n a tauh goal.

Norwegian striker hian league match 38 aṭangin goal 39 a khung tawh a, goal 40 khung tura match mamawh tlem ber record a siam a rinawm hle. Tuna record ding lai hi Alan Shearer leh Andy Cole te record inṭawm a ni a, goal 40 khung turin match 45 an mamawh.

Goal khungtu Rodri

City-in goal hnihna an khung theih bik loh avangin Sheffield United-in hun tawp lamah 'risk' lain an nawr ngam ṭan a, a tawpah goal an sual chhuak. Kyle Walker-a'n box chhungah a kheng sual a, hemi aṭanga ball kal zel hi Bogle-a'n kawh zetin a pet goal. Minute 85-naah 1-1 a ni a, point hloh thei dinhmunah City an ding.

Bench aṭangin Phil Foden a rawn lut nghal a, City tan Alavarez-a'n chance ṭha bik a hlah. Mahse, chakna goal khung turin hun an nghak rei lo. Minute 88-naah Walker-a'n a tihsual siam ṭhat nan dinglam aṭangin a la lut a, a cross ball chu Foden-a'n la thla sual mah se a per chu Rodri-a'n chiang zetin a pet goal.

Rodri hi defender puitu midfielder a ni ringawt tawh lo a, mamawh hunah pet goal thei a ni. Season liam ta Champions League-ah Rodri hi best player a ni a, City tana a pawimawhna a lang chho zel bawk.

Man City chakpuitu Rodri chuan, "Goal an venghim ṭha a, hmun ruak min pe lo. Penalty kan hlah a, chutihrualin a tawp thlengin goal khung tumin theihtawp kan chhuah. Football-ah hi chuan hun tawp dawna pet goal ṭum a awm ṭhin a, chutiang bawkin vawi khat tihsual vanga inhnehtawk pawh a awm. Chetsual chuan point hloh theih a nih avangin tihsual a thiang lo," tiin a sawi.

Champion lai Manchester City hian September 2, Inrinni zan hian Arsenal nena inhnehtawk Fulham an mikhual ang.