US Open Nikum aiin ka hriam zawk - Alcaraz

US Open an khel ṭan a, season hmasa champion Carlos Alcaraz chu mipui mit fukna a ni leh dawn a, a match hmasa ber atan Nilaini zing dar 5:45-ah German tlangval Dominik Koepfer nen an inkhel dawn a ni.

Nikum khan Alcaraz hian US Open nomawi a chawi a, world number 1 ni thei naupang ber record a siam zui hial, a hnu lawkah erawh hliam vangin thla li chhung a chawl a, number 1 a nihna pawh hum zui thei loin loh theih lohna avangin a tlahniam.

A hliam a dam hnuah ropui takin a lo kir leh mek a, clay court inelna lian French Open-ah Novak Djokovic ngam lo mah se, grass court inelna lian Wimbledon title la turin Novak hi a hneh let a, tun ṭumah pawh hian final-ah an intawng leh thei dawn a ni.

Kum 20 mi Alcaraz chuan, "Theih ni se la chuan boruak rit leh nawrna awm tel miah loa inkhelh theih ka châk, mahse tunah chuan chutiang ngawta awm theih chu a ni tawh bik lo a, engkimah ka fimkhur a ngai hle.

"New York khawpuiah hian Spanish mi an tam êm êm a, kan ṭawng ang hmang South American mi an tam bawk, heng mite hian khawsak an ti awlsamin min ti mikhual lo hle a, ka tana mi ṭangkai tak tak an nih avangin ka lawm," a ti.

Season hmasa kha chuan khelmual pawn lam boruakin a la tibuai lo a, kuminah erawh mipui ngaihven a nih tawh miau avangin a boruak a danglam tawh dawn, thla 12 chhunga thil danglam chu a hmachhawn thiam ngei a ring thung.

World number 1 Alcaraz chuan, "Grand Slam hmasa zawk ka lak aṭanga tun inkarah hian thil a thleng tam êm êm a, major title bakah nomawi dang pawh ka chawi ve nual, khang ka thil tawnte khan player puitling leh hram zawkah min chher," a ti.

Match hmasa ber a khelh hma aṭanga zawhna a dawn chu Novak Djokovic chungchang a ni, world number 2 nen hian final hma chuan an intawng thei dawn lo, mahse tunlai mipa tennis player ṭha pahnih an nih miau avangin an chungchang hi chanchinbumi ten an zawt deuh zel.

Spanish tlangval Alcaraz chuan, "Zep tur a awm lo, kan infiamna tennis huangah chuan Novak hi a ropui leh ṭha berte zinga mi a ni. A rilru a paukhauhin a beidawng ve ngai miah lo.

"Tun ṭum tournament-ah hian kan intawng dawn em, tih ka sawi lawk ngam lo, a chhan chu final hmain kawng zawh tur a thui hle a ni. Kan intawng a nih chuan ka khelh dan phung pangngaia khelh ka tum ang, a game anga ka khel ve a nih chuan ka tan kawng a inhawng lo ang," a ti.

Champion tura rinkai zinga mi Alexander Zverev chu zanin dar 8:30 hian a inlan ve dawn bawk. German tlangval hian Australian player Aleksandar Vukic a hmachhawn dawn a, set nga khelh ngai loa chak tlang a pawimawh ang.

Zverev hian theihna a nei sang, mahse Grand Slam-ah a la champion ngai lo. Major tournament hi chawlhkar hnih chhung an khel ṭhin a, best of five hmanga chak zawk zawn a ni ṭhin. Zverev hian inelna tir lamah set a khelh hneh a tuar a, a tawp lamah a tha a zuai leh hman ṭhin a ni.

Chuvangin, world number 2 hial pawh lo ni tawh hian inelna liana hlawhtlin a duh chuan a tir lamah a thahrui a khek thiam ve a pawimawh tihna a ni a, kumin US Open-ah hian seeded 12-na niin, a kaltluang zel a nih chuan semifinal-ah Alcaraz nen an inhmachhawn thei dawn.