Zanin aṭangin League Cup second round

Carabao Cup second round chu zanin aṭangin khelh a ni dawn a, inkhel tur ṭhahnem tak zingah Premier League club pahnih Fulham leh Tottenham Hotspur inkhel tur chu ngaihven hlawh bik a ni ang.

League Cup tia hriat lar Carabao Cup-ah hian team 92 tehmeuh an inel a, first round khelh tawh niin Championship bakah League One leh League Two club ten an khel ṭan tawh. Second round aṭangin Premier League club an inlan ṭan dawn a, chutihrualin Europe khel tur club pariat te an la tel dawn lo.

Europe inelnaa tel tur club-te chu Champions League khel tur Manchester City, Arsenal, Manchester United leh Newcastle United te; Europa League khel tur Liverpool, Brighton & Hove Albion leh West Ham (Conference League champion) te bakah Conference League khel tur Aston Villa te an ni.

Second round zinga inkhel en châkawm Fulham leh Spurs te hi Craven Cottage-ah khelh a ni dawn. Spurs hi manager thar Ange Postecoglou hnuaiah season bul an ṭan ṭha thawkhat a, match hmasa berah Brentford nen inhnehtawk mah se Manchester United leh Bournemouth te 2-0 ve vein an hneh.

Spurs hian Harry Kane a awm loh hnuah match tinah goal hnih zel an la khung a, goal khung kawngah buaina an la nei lo. Midfield-ah James Maddison, Yves Bissouma leh Pape Matar Sarr te an hmuhnawm ṭhin a, chutihrualin League Cup-ah chuan squad an siksawi a rinawm zawk.

Fulham hian Everton hnehin season bul ṭan mah se Brentford lakah 3-0 in an tlawm. Chutihrualin match hnuhnung berah player 10-a khel chungin Arsenal nen an inhnehtawk a, Emirates Stadium-ah point an hlawhchhuah theih avangin Spurs tan zuam ngawt a rem lo ang.