Durand Cup 2023 Bagan-in Mumbai an hneh

Pathianni zan khan Durand Cup 2023-a mipui ngaihven hlawh ber pawl inkhelah Lallianzuala Chhangte khelhna Mumbai City FC leh Mohun Bagan an intawng a, quarterfinal boruak sangah Mohun Bagan hian 3-1 in hnehna an chang.

Inkhel ṭan aṭanga minute kuana lekah Mumbai keeper Phurba Lachenpa chuan Jason Cummings a titlu a, season hmasa A League-a goal 20 ngawt khung thei striker hian a penalty hlawhchhuah hi goal-ah a chantir.

Mumbai tan Jorge Diaz chuan minute 28-naah si phurh sut mah se Kolkata club-in Manvir Singh leh Anwar Ali hmangin an chhanglet a, season thar ISL-ah pawh inel ber tura ngaih team pahnih inkhelah 3-1 in Bagan an chak.

Salt Lake Stadium, Kolkata-a inkhelah team pahnihin an player neih ṭhat ber ber an thawhchhuahpui a, Bagan an chungnung zawk - Mumbai tan Lallianzuala Chhangte leh Lalengmawia Ralte ten inkhel bul an ṭan a, an team an chhanhim thei bik lo.

Durand Cup semifinal hi zaninah khelh ṭan a ni dawn a, NorthEast United leh East Bengal ten zanin dar 6:00 hian Salt Lake Stadium, Kolkata-ah semifinal hmasa zawk an khel ang.

Highlander-ah hian forward Rochharzela leh midfielder Fredy Chawngthansanga te chu Mizo awm an ni a, East Bengal hian defender ṭha Lalchungnunga leh midfielder ṭhangduang Vanlalpeka Guite an kawl thung.