Saudi Arabia coach thar Roberto Mancini

Italy coach nihna a bansan hlim khan Roberto Mancini chuan a ban chhan kha Saudi Arabia lam sawmna vang a nih loh thu a sawi a, a ban aṭanga chawlhkar hnih pawh a liam fel hmain Arab ram a pan leh ta si.

Kum 58 mi Mancini hian Euro 2020-ah khan an ram a champion pui, inelna thlengtu England chu Azzurri hian penalty shootout-ah an hneh a, mahse Qatar World Cup khel turin an tling zo lo.

Manchester City pawh lo enkawl tawhtu Mancini hian Saudi Arabia ram team enkawl tur hian kum 2027 thleng daih contract a ziak. A match hmasa ber atan September 8 hian St James' Park-ah Costa Rica nen an inkhel ang.

Italian manager Mancini chuan, "Ram hranah chona thar ka hmachhawn thei tur hi ka lawm. Asia khawmualpuiah football a lar thar hle a, chung zingah chuan ka tel ve dawn.

"Tun hnaiah nasa takin Saudi Pro League chuan hma a sawn a, hei hian Saudi Arabia ram team lamah pawh rah ṭha a chhuah ngei ka beisei," tiin a sawi.

Mancini hian club lamah chuan Man City bakah Fiorentina, Lazio, Inter Milan, Galatasaray leh Zenit St Petersburg te a lo enkawl tawh a, tawnhriat a nei ṭha hle.