Goal sarih a lut - Barcelona an chak

Pathianni zan khan Villarreal khelmualah goal sarih a lut a, Barcelona an chak - goal erawh Catalan club khung vek a ni lo a, Barca hian khualmualah 4-3 in hnehna an chang hram a ni zawk.

Barcelona tan Gavi leh Frenkie de Jong ten minute 15 chhungin goal hnih an khung hman a, Villarreal khelmualah harsatna nei loin an chak mai dawn niin a lang hman.

Mahse, Yellow Submarine hian Juan Foyth, Alexander Sorloth leh Alex Baena hmangin an chhanglet a, minute 50 a thlen meuh chuan mualneitu team hian 3-2 in hma an hruai daih!

Barcelona-in awlsam taka tlawm mai erawh an tum bik lo. Ferran Torres chuan minute 68-naah si phurh sutna goal khungin, Robert Lewandowski chuan league hmasa match hniha goal a khung loh hnuah chakna goal a khung ve leh bawk.

Minute 12-na leka Barcelona tana Gavi goal khung tur chu Lamine Yamal siamsak a ni a, kum 16 leh ni 45 mi chauh niin, kum 2001 hnu lama La Liga-a assist thei naupang ber record a siam.

Barcelona academy aṭanga inzir chhuak Yamal hi Villarreal fan-ten ding chungin zahna an lantir a, inkhel entuten a thiamzia hahipin an sawi.

Catalan club boss Xavi chuan, "Player ṭha tak a ni a, ven har tak, tha za êm êm, khingpuite tana ven thiam har tak a ni. Hmabak a nei êng hle," tiin a player hi a fak.

Yamal chuan, "Manager-in chance min siamsak apiang chu a ṭha thei ang ber zela hman ka duh a, ka hlauthawng lo. Nuam ti taka football khelh zel ka duh a, hei hi ka ṭhatna ber pawh a ni," a ti a, a inringtawk hle.

Pathianni zan La Liga inkhel dangah Isco chuan Real Betis tan goal a khung a, a team erawh a chakpui zo lo - Betis hian Athletic Bilbao chu khualmualah lenchilhin, Willian Jose leh Isco hmangin goal hmahruai an khung.

Mahse, Mikel Vesga penalty goal hnih, Gorka Guruzeta leh Unai Gómez-te goal khat ve ve khung hmangin Bilbao hian an lo chhanglet a, an mikhual hi 4-2 in an lo thlah.

Real Betis league match hmasa pahniha man of the match-a thlan Isco-a'n goal a khung zanah a team chakpui zo lo mah se a tan zan chhinchhiahtlak a ni - a goal khung kha October hnua a khung hmasak ber niin, September 2021 hnua La Liga goal a khung leh hmasak ber a ni bawk.