Goal khung mi Kane-a'n goal a khung

Bayern Munich-in Pathianni zan khan FC Augsburg 3-1 in an hneh a, Harry Kane-a'n Allianz Arena-a a khelh hmasak berah goal hnih a khung. England captain hian Bayern tana Bundesliga match hnih a khelh aṭangin goal thum a khung tawh a, Bavarians-in match hnih an khelh tawhah hnehna an chang ve ve bawk.

Thomas Tuchel-a hnuaiah Bayern inkhelh a la dak ṭha tawk lo a, Kane-a'n goal chance pawh a la ngah tawk lo. Chutichung chuan Kane-a'n goal khung hna a thawk ṭan a, season a tawp meuh chuan a football career-a nomawi hmasa ber bakah top scorer chawimawina a dawn ngei a rinawm hle.

Allianz Arena-ah Bayern-in bul ṭan ṭha tawk lo mah se goal hmaah an vannei. Minute 32-naah Leroy Sane ball pet na tak chu keeper Dahmen-a'n dang mah se a per chu Felix Uduokhai-a'n an lamah a tilut a, goalline a pel chiah chiah.

Minute 40-naah Joshua Kimmich-a'n box pawn aṭangin goal-ah a pet a, Daniel Siebert kut a per avangin VAR hmanga ennawn hnuah penalty pek a ni. Kane-a'n penalty hi goal-ah a chantir.

Second half-ah Kane-a'n a theihna tak a pholang a, minute 69-naah striker goal a khung. Alphonso Davies-a ball pek chu Kane-a'n chhir zeuhin a goal mawi hle.

Hun tawp hma hretin Dion Drena Beljo-a'n siphurh a sut ṭhen a, scoreline timawitu chauh a ni. Kane-a'n a lu hmangin hattrick siamna hun ṭha nei mah se goal zawnah a tauh thei lo. Pathianni zan Bundesliga inkhel dangah Mainz leh Eintracht Frankfurt 1-1 in an inhnehtawk.