An ramah pawh Verstappen tho a chak

Formula 1 tun season zet chu Max Verstappen tana siam a ni ringawt mai. Pathianni zana tlan zawh tak Dutch Grand Prix-ah pawh tualchhung tlangval bawk hian hnehna a chang leh ta.

Verstappen hian tun hnaiah a zawnin vawi kua hnehna a chang tawh, tun season bikah ṭum 11 ngawt chak tawhin driver championship lama hmahruaitu a nihna a sawhnghet ta hle bawk.

Khawvela car intlansiakna sang ber hi season chawhnu lam an hmang ṭan leh mek. September 3, Pathianni zan tirah Italian Grand Prix chu Autodromo Nazionale Monza tlankawngah an tlan leh ang.

Max-a nge nge

CM.com Circuit Zandvoort-a intlansiakah Red Bull driver Verstappen hian a teammate Sergio Perez hnunga tlan zawk lai a nei a, mahse lap 13 an tlan chuan a hmasa berah a tlan fel leh der tawh.

Car a nei ṭha a, driver ṭha bik a nih bawk avangin team dang tan Verstappen chu elphak rual loha chak a ni mek. A hnungah hian beisei phak baka season hmang ṭhatu Fernando Alonso a thleng.

Mercedes driver Lewis Hamilton chu paruknaah a thleng a, British driver tan champion beiseina la bo vek lo mah se kawng a harsa dawn tawh hle, championship table-ah pawh palina a ni phak chauh a ni.

An fak e

Formula 1 champion vawi hnih ni tawh Alonso chuan, "Infiamna huang mi pakhatin a thunun hneh tak mai hi chu a ropui, chutihrualin midang tan elphak loh khawpa ṭha erawh a ni bik lo, kei ngei pawhin ka elphak thei ang.

"Amaherawhchu, tun dinhmunah chuan Max hi midang hmaah chak takin a tlan mek a, hei hi kan pawm pawh a ngai. Driver dangte pawh hian inrintawkna sang tak nei se la, an tan kawng a awm," tiin a sawi.

Tun hnai khan Ferrari driver Charles Leclerc chuan an tan Red Bull chu elphak an nih loh thu a sawi a, kum 2026 thleng F1 an thunun a rin thu a sawi a, vawi sarih champion tawh Hamilton pawhin hetiang lam hawi hian thu a lo sawi tawh bawk a ni.