West Ham-in Kudus an la lut

Ajax midfielder hmuhnawm Mohammed Kudus-a'n West Ham a zawm a, Ghanaian midfielder man hi pound maktaduai 38 aiin a tlem lo ang.

Kum 23 mi Kudus hian August 24, Ningani khan Ajax tan Europa League playoff khelin Ludogorets lakah hattrick a siam a, Hammers-in player hmabak nei êng zinga mi an la lut.

Kudus chuan, "Kum naupang tê ka nih aṭangin Premier League anga inelna sanga khelh hi ka suangtuah ṭhin. West Ham tana ka khel thei hi ka lawm a, heta tawp mai hi ka tum lo - hmasawn zel ka tum," tiin a sawi.

August thlatir khan Brighton-in Kudus chungchangah hian Ajax nen inremna an nei a, amaherawhchu mimal contract-ah inremna an nei thei lo.

Kudus hian Danish club Nordsjaelland tan kum 2018 khan bul ṭanin kum 2020 khan Ajax a zawm a, Dutch club tan hian match 87-ah goal 27 khungin Dutch league title pahnih a lakpui.

Season liam ta khan Kudus hian Eredivisie bikah match 30 khelin goal 11 a khung a, Ajax hi pathumna a nihpui. Ghana tan Kudus hian kum 2019 aṭang khan a khel ṭan a, match 24 aṭangin goal sarih a khungsak. 2022 World Cup-a Ghana-in South Korea 3-2 a an hneh ṭum khan Kudus hian goal hnih a khung.

West Ham hian Ajax aṭangin midfielder Edson Alvarez chu £35mtd velin an la lut tawh a, tun nipui bazarah Southampton aṭangin midfielder James Ward-Prowse leh Stuttgart aṭangin defender Konstantinos Mavropanos te an la lut tawh bawk.