Juventus an chak zo lo

Paul Pogba chuan kumin May thla hnua a vawi khat nan Juventus tan a khel ve leh ta a, mahse a team hi hnehna a chanpui zo lo, an mikhual Bologna nen 1-1 in an inhnehtawk.

Mikhual Bologna tan Scotland midfielder Lewis Ferguson chuan goal hmahruai a khung a, mualneitu lam tan striker Dusan Vlahovic chuan hun tawp hma minute 10 chauh awm tawhah si phurh sutna goal a khung.

Manchester United aṭanga Old Lady a pan leh hnuah Pogba a la che fuh thei lo, hliam vangin season hmasa kha a khel mumal lo, season hmasa nipui aṭanga chhiarin Turin club tan hian minute 161 chauh a la khel.

Tuna chanchin lawmawm erawh harsatna nei loa a inkhel thei ve leh ta hi a ni ang. Cremonese an hneh ṭumin bench aṭangin a lut a, tunah chuan a tir aṭangin a khel thei tawh - player pawimawh a nih chhunzawm a rinawm.

Pathianni zan inkhel dangah champion lai Napoli chuan Sassuolo 2-0 in an hneh. Inrinni zan khan AC Milan leh Hellas Verona te an lo chak tawh bawk a, anni pahthum hi a zawna chak thei an ni.

Nizan khan Inter Milan an inlan a, result kan hre hman lo. An chak a nih chuan Napoli, Milan leh Hellas Verona te hnung zuiin point ruk an hmu ve ang.