US OPEN : A chung berah Novak Djokovic a kir
Grand Slam zinga hnuhnung ber US Open khelh laiah Novak Djokovic tan sulhnu hrang hrang hnutchhiah tur a awm - major title nei hnem ber a nihna a sawhnghet thei a, hard court inelna lianah hian a vawi li nan champion a beisei bawk; world number nih theihna a awm bawk a ni.
Nimin zing khan Djokovic hian inelna bul a ṭan ta ngei a, a match hmasa berah Alexandre Muller chu 6-0, 6-2, 6-3 a sawpin second round a inhlangkai a, world ranking chhuak tharah chuan Carlos Alcaraz nek chhuakin pakhatna a ni ang.
US Open khelh hma khan Djokovic leh Alcaraz te ranking point inthlauhna kha 20 chauh a ni - Serbian star tan a chung bera lawn kai leh turin vawi khat chak a tawk, champion lai Alcaraz erawhin a point neihsa a hum a ngai.
Kir lehna
Novak Djokovic hi pa luhlul ve tak a ni a, player dangte nen Grand Slam title lak hnem lama an inel lai pawhin tournament khelh loh ṭhat a pawiti miah lo, hripui leng laka invenna vaccine a la duh ṭhak lo a ni.
Season hmasa khan Australian Open leh US Open a khelh theih loh phah. Kuminah erawh Australian Open title a la fel leh tawh; New York khawpuiah pawh hian player tawh khirh berte zinga mi a ni dawn.
US Open vawi thum champion tawh hian Muller hneh turin harsatna a tawk miah lo, set khatnaah phei chuan game a hloh lo. Set hnuhnung pahnihah pawh buaina nei loin a chak tlang chiang hle.
Kum 36 mi Djokovic chuan, "A bul kan ṭan ṭhat em avang khan thil a awlsam phah ve deuh. Set hnihna leh a hnuhnung berah kha chuan ka khelh dan phung tlemin ka hloh deuh a, buaina lian tam erawh ka tawk lo," tiin a sawi.
Grand Slam vawi 23 champion tawh Djokovic hian a match lehpek atan chuan Bernabe Zapata Miralles a tum ang. Tun ṭumah hian a champion leh thei a nih chuan, major title la hnem ber Margaret Court-i record (24 titles) a nihrual ang.
Djokovic hian hian major tournament bikah chuan a zawnin vawi 67 zet mai first round-ah hnehna a chang tawh, hneh nei loa a tlak hnuhnun ber chu 2006 Australian Open daih tawh kha a ni. US Open bikah hian third round thleng loa tlak a la nei ngai lo.
Rune a tla nghal
Infiamna huangah chuan chak tur chiangsa hi sawi lawk a harsa ṭhin. US Open 2023-ah pawh seeded palina Holger Rune chu hneh nei loin a match hmasa berah a tla nghal, a khingpui world number 63 Roberto Carballes Baena lakah 6-3, 4-6, 6-3, 6-2 in a chak lo.
Kum 20 mi Rune hi player chhuak thar hmuhnawm berte zinga mi a ni phak a, chutihrualin tun hnaiah match a khelh tam tawk loh avangin atan thil a harsa. Wimbledon quarterfinal-a a chak loh hnuah match hnih chauh a la khel leh a ni.
A khel tawk lo tih chu a chiang a, chutihrualin inkhelh laklawh laiin a ke vei lam hliam vangin enkawl lailawk a ngai bawk. Denmark tlangval Rune hi Toronto leh Cincinnati Open-ah pawh hma tlak a lo tla tawh a, insiamṭhat a ngai hle.
Rune a tlak lai hian Dominic Thiem erawh a chak. Austrian tlangval hian US Open-ah sulhnu a nei ṭha, mahse banrek hliam vangin a talbuai rei ta hle. Tun ṭumah pawh hian chak tura rinkai ni chiah lo mah se Alexander Bublik chu 6-3, 6-2, 6-4 in a hneh.
Thiem hian Grand Slam a khelh hnuhnung parukah hnehna a chang miah lo, tunah chuan a record duhawm lo tak hi a kalsan ta. Major tournament bikah chuan kum hnih chuang hnuah chak ni hmel a hmu ve leh ta a ni.
Kum 29 mi Thiem chuan, "Grand Slam bika hnehna ka chan hnuhnung ber kha chu Covid-19 len lai a ni a, a hmuna entu pawh an awm lo. A hnu lamah erawh ka chak lo ngar ngar, tuna ka chak ve leh ta hian min ti lawm hle," tiin a sawi.
Ruud tan match 200
US Open champion thei tur zinga mi Casper Ruud chuan bul a ṭan fuh, seeded pangana hian Thawhṭan zan inkhel inhnehtawk takah tualchhung tlangval Emilio Nava chu 7-6(5), 3-6, 6-4, 7-6(5) in a hneh.
Kum 24 mi Ruud hian tennis a khelh hun chhungin match 200-ah hnehna a chang ta chiah a, a tan chuan mellung pawimawh tak a ni. French Open leh US Open final pawh lut tawh hian kuminah major title title hmasa ber a beisei mek.
Norway tlangval Ruud chuan, "Ka khingpui Nava kha world number 154 a ni a, a ranking leh qualifier kaltlanga main draw khel a nihna kha dah hniam a remchang lo, a tir aṭang khan hmachhawn a hautak hle.
"Set pahnihah tie break kan khelh a ngai a, a tawi zawnga sawi dawn chuan a vannei zawkah ka ṭang hlauh a ni," tiin a sawi. Zanin hian Chinese tlangval Zhang Zhizhen nen an inhmachhawn leh dawn a ni.
Arthur Ashe Stadium lama inkhel dangah, seeded 10-na Frances Tiafoe chuan amah ang bawka American player Learner Tien 6-2, 7-5, 6-1 in a hneh. Kum 2022 semifinalist Tiafoe bakah hian seeded pakuana Taylor Fritz chuan Steve Johnson 6-2, 6-1, 6-2 in a hneh.