King's Cup khel tur Lianzuala & Chungnunga
India coach Igor Stimac chuan international break-a India tana inlan tur squad a puang a, Mizo tlangval Lallianzuala Chhangte leh Lalchungnunga te chu squad-ah an tel.
Blue Tigers hian tun international break-ah hian Thailand-a neih tur King's Cup an hmachhawn dawn a, player 23 koh zingah Mizo player pahnih an tel - September 7-10 inkarah khelh a ni dawn.
India squad-ah hian captain Sunil Chhetri chu a nupuiin an fa hmasa ber tur a hrin dawn avangin koh a ni lo a, Manvir Singh, Rahim Ali leh Rahul KP te chu Chhetri awm loh hlana India-in striker duhthlan tur a telhte an ni.
Lianzuala a tel
India squad puan a nihin Lallianzuala Chhangte a tel loh chuan a kim tawh lo a, Mumbai City forward hi tun ṭumah pawh hian Blue Tigers tan inlan tura koh a ni. Lza chuan, "Rei tak hnuah away game kan khel dawn a, kan hmachhawn tur lah Iraq an nih nghal avangin hna hautak zet a ni dawn," tiin Vanglaini a hrilh.
Lunglei tlangval hian India tan match 28 khel tawhin, goal sarih a khung tawh a, kuminah India tan Tri-Nation Series, Hero Intercontinental Cup leh SAFF Championship nomawi a chawi tawh - Blue Tigers tan nomawi hlawhchhuah belh ngei a duh dawn.
Lianzuala hian season hman zawh tak kha a hmang ṭha hle - ISL-ah hero of the league atan thlanin, AIFF Men's Player of the Year leh FPAi Indian Player of the Year-ah thlan a ni a, Mizo forward tan a hun hman duhawm chhunzawm turin tun inelna hi a pawimawh ang.
A vawi khatna
Lianzuala rualin Mizo pakhat koh a ni a, a hming chu Lalchungnunga a ni. Durtlang defender chak hian season hmasa aṭang khan ISL a khel ve ṭan chauh a, mahse, East Bengal tlarhnungah a rinawm em avangin ram tan koh a ni ta der - Asian Games-ah Chungnunga hi India tan a inlan dawn bawk.
Aizawl FC defender hlui chuan, "Ka phur tawh khawp mai. India senior team-a vawi khat koh ka nihna a ni. Ka rilru chuan beisei ru ve tho mah se, player ṭha tak an awm avangin rin dan thiam erawh a harsa.
"Theihtawp chhuah phawt ila, kan dinhmun zel tur chu kan hria ang chu," tiin Vanglaini a hrilh - Chungnunga hian nizan khan Durand Cup semifinal-ah East Bengal tan NorthEast United a hmachhawn a, an result kan hre hman lo.
King's Cup chu
Thailand-a neih tur King's Cup hi Football Association of Thailand-in an buatsaih a ni a, inelna thlengtu bakah hian India, Iraq leh Lebanon ten inelna an hmachhawn dawn.
FIFA ranking-a 99-na India hian 70-na Iraq chu match hmasa berah an tum nghal ang a, an chak chuan Thailand leh Lebanon inkhela chak zawk final-ah an tum ang - chak loh erawh chuan a chak lo zawk nen pathumna nih an inchuh dawn.
King's Cup 2019-ah khan India hi lo inlan tawhin, match hmasa berah Curaçao ngam lo mah se, pathumna inchuhna inkhelah 1-0 in Thailand an hneh.
India Squad
Goalkeepers: Gurpreet Singh Sandhu (Bengaluru), Amrinder Singh (Odisha), Gurmeet Singh (Hyderabad)
Defenders: Asish Rai, Nikhil Poojary (Hyderabad), Sandesh Jhingan (FC Goa), Anwar Ali (Mohun Bagan), Mehtab Singh (Mumbai City), Lalchungnunga (East Bengal), Akash Mishra (Mumbai City), Subhasish Bose (Mohun Bagan).
Midfielders: Jeakson Singh (Kerala Blasters), Suresh Singh (Bengaluru), Brandon Fernandes (FC Goa), Sahal Abdul Samad (Mohun Bagan), Anirudh Thapa (Mohun Bagan), Rohit Kumar (Bengaluru), Ashique Kuruniyan (Mohun Bagan), Naorem Mahesh Singh (East Bengal), Lallianzuala Chhangte (Mumbai City)
Forwards: Manvir Singh (Mohun Bagan), Rahim Ali (Chennaiyin), Rahul KP (Kerala Blasters).