Training duh lo Nunes pawisa chawitir dawn

Wolves midfielder Matheus Nunes chuan Manchester City zawm ngei a duh a, a thil duh a hlawhtlin theih nan hma a la mek. Nunes hian team training a zawm duh lo a, hei vang hian pawisa an chawitir dawn.

Premier League champion lai Man City hian kar hmasa khan Nunes lei tumin Wolves hi an dawr, pound maktaduai 47 zet keng mah se Citizens dawrna hi an lo hnar a ni.

Tun kar tawpah nipui bazar a tawp tawh dawn - Wolves chian an midfielder Nunes hi Man City lakah sum tam zawkin hralh theih an beisei. Nunes hian team lian leh ṭha zawm theihna remchang a neih hi bawhpelh a hlau hle tih a lang bawk.

Pathianni leh Thawhṭanni khan Nunes hian team training a zawm lo, training a zawm loh tur thu hi manager Gary O'Neil a hrilh loh avangin hremna a hmachhawn dawn a ni.

Wolves hian season hmasa nipui lai khan Sporting Lisbon aṭangin Nunes hi an lalut a, pound maktaduai 38 man niin an club player man tam ber a ni a, kum nga daih contract an ziahpui - season khat lek hnuah an chan ngei dawn niin a lang.

Pep Guardiola enkawl Man City erawhin an player duh nei turin sum an hman tam hret a ngai dawn niin a lang. Khawthlang chanchinbu mite chuan Wolves hian pound maktaduai 60 bawr an beisei niin an sawi.

Man City hi an captain Ilkay Gundogan a chhuak a, midfielder ṭha Kevin de Bruyne chu hliam vangin a chawl mek. Midfielder an mamawh a, an biak hmasak Lucas Paqueta chungchangah harsatna a awm avangin Nunes an ngaihven zual ta a ni.