Swiatek tan hna a awlsam

US Open hmeichhe champion lai Iga Swiatek chuan Thawhṭanni zan khan Rebecca Peterson chu 6-0, 6-1 in a hneh a, a nomawi kawl lai humhim ngei thei turin tournament bul a ṭan fuh hle.

New York khawpuia inkhelah Swiatek hian harsatna a tawk lo. Grand Slam inelna meuh ni mah se Polish nula hian hnehna chang turin minute 58 bak a mamawh lo, game khat chiah a hloh avangin darkar khat tling loah a chak thei tihna a ni.

World number 1 Swiatek chuan, "Nitin mai hian hmasawn ka ngaihzia ka inhre thar leh ṭhin. Statistics leh score line hi ka tan a pawimawh ber lo, a pawimawh zawk chu ka khel ṭha em tih a ni a, nuamti taka khelh theih a pawimawh bawk.

"Inelna lianah chuan a brouak a danglam ṭhin a, chuvangin engmah hi huaisen taka sawi lawk theih a ni lo," a ti. Second round-ah chuan Australian nula Daria Saville nen an inkhel leh ang.

Swaitek elpui ni thei tur Coco Gauff pawh a chak. American tleirawl Gauff hi awlsam taka chak erawh a ni lo - German qualifier Laura Siegemund laka set a hloh hnuin 3-6, 6-2, 6-4 in a chak zawkah a ṭang hram a ni.

US Open inbuatsaihna Cincinnati Masetrs-ah khan Gauff hi a champion, final kalkawngah Swiatek a hneh hial. An rama inelna lianah hian champion rinkai a ni phak a, kum 19 mi hi a puitling tak tak tawh em fiah a ni ang.

Seeded parukna Gauff chuan, "Engmah hi awlsam taka neih theih a ni lo a, round hmasa lam pawh awlsam taka paltlang ngawt theih a ni hek lo. Chuvangin fimkhur taka ka khelh a ngai," a ti.

Inkhel dangah Elena Rybakina pawh a chak. Seeded palina hi a dar (shoulder) hliam vangin buai deuh mah se Ukraine mi Marta Kostyuk chu 6-2, 6-1 in a hneh ta tho. Seeded 19-na Beatriz Haddad Maia pawhin 2017 champion Sloane Stephens a hneh ve bawk.

World number 1 hlui Caroline Wozniacki pawh a lo kir, Danish nula hian kum 2020 January thla khan tennis a chawlhsan lailawk - fa pahnih a neih hnuah a lo kir leh a, Grand Slam a khelh lehna hmasa berah hian Russian player Tatiana Prozorova chu 6-3, 6-2 in a hneh a ni.