League Cup-ah Chelsea inlan dawn

Carabao Cup second round-ah Europe inelnaa tel turte an inlan dawn lo a, Chelsea erawh tun season-ah European competiton an tel phak loh avangin zaninah an inlan ang. Stamford Bridge-ah Blues hian fourth division club AFC Wimbledon an mikhual ang.

Mauricio Pochettino hote hian Premier League match thum an khelh tawhah Liverpool, West Ham leh Luton Town te an hmachhawn a, kai thar Luton chauh an hneh. Chutihrualin Blues hian Liverpool an chelh bawk a, point li an hlawh chhhuak tawh.

Argentine manager Poch-a'n inhliam tih loh chu player a siksawi meuh lo a, League Cup-ah erawh an inthlak hlawk a rinawm. Goalkeeper thar Djordje Petrovic pawh inlan thei dinhunah a ding. Ani bakah hian Noni Madueke, Ian Maatsen, Lesley Ugochukwu leh Mason Burstow te an khel a nih pawhin a mak lo ang.

Man United nena sawizawm Marc Cucurella pawh la inlan thei dinhmunah a ding a, player thar Romeo Lavia erawh a khelh theih a rinawm loh. Chelsea hian player inhliam an nei nual a; chungte chu Reece James, Wesley Fofana, Benoit Badisashile, Christopher Nkunku leh Carney Chukwuemeka te an ni. Hei vang hian Poch-a'n duh thalin squad a la siksawi thei dawn lo.

Chelsea hian fourth division club lakah record a nei ṭha. London club hian fourth division club an hmachhawn hnuhnung 15-ah vawi 14 an chak a, vawi khat an inhnehtawk. Blues hian Wimbledon an hmachhawn hnuhnung pasarihah tlawm an nei lo bawk a, vawi li chakin vawi thum an inhnehtawk.

Chutihrualin Wimbledon hian season bul an ṭan ṭha, League Cup second round thleng turin Championship club Coventry City 2-1 in an hneh. League Two-ah pawh Wimbledon hian hneh loh an la tawng lo a, match nga khelh aṭangin poing kua an hmu tawh a ni.

Inkhel dangah Nottingham Forest leh Burnley te an inkhel dawn a, Premier League club pahnih an inhmachhawn miau avangin pakhat zawk tan third round-ah hmun a awm lo. Everton pawhin Doncaster Rovers an hmachhawn dawn a, league-ah match thum khelh aṭanga point an la hmuh loh avangin tun hi insiamṭhatna hun a ni thei ang.