Lukaku leh Mourinho an thawkdun leh dawn

Chelsea striker Romelu Lukaku chuan season khat chhung loan hmanga khel turin Serie A club AS Roma a zawm dawn. Italian club hian loan fee-ah euro maktaduai 9.33 (£8m) an pe ang a, thla 10 chhung hlawh euro maktaduai 7.5 an tumsak bawk ang.

Belgian striker Lukaku hi Chelsea boss Mauricio Pochettino hmachhawpah tel lo mah se Italian club lamah erawh a tla na hle. Inter Milan leh Juventus te pawhin loan hmangin an duh a, amaherawhchu Jose Mourinho enkawl Roma-in an chang ta thung.

Season liam ta khan Lukaku hian loan hmangin Inter tan a khel a, league match 25-ah goal 10 khungin UCL-ah match riatah goal thum a khung bawk. Belgian striker hian season pangngai tak hmang mah se UCL final-a Manchester City an hmachhawn ṭumin coach Simone Inzaghi-a'n bench-ah a dah a, a lungawi lo.

Juventus pawhin Lukaku duh mah se Belgian striker lalut tur chuan squad siksawi hret a ṭul a, hei hi an theih loh avangin an chang dawn ta lo. Roma hian Lukaku hi an la fel hnai a, he thu i chhiar meuh chuan an lalut tawh hial ang.

Roma hi season hnuhnung pahnihah paruknaah an awm a, hmasawn an duh lantir nan hming langsar Lukaku an lalut dawn. Mourinho hote hian season bul an ṭan ṭha tawk lo a, Salernitana nen 2-2 a inhnehtawk hnuah player 10-a khel Verona lakah 2-1 in an tlawm. September 1, Zirtawpni zan hian Roma-in AC Milan an mikhual ang.

Portuguese manager Mourinho hian Manchester United a enkawl lai khan Lukaku hi Everton aṭangin kum 2017 khan a lalut. Mourinho hnuaiah Lukaku hian match 51 khelin goal 27 a khung a, assist vawi kua a nei bawk - match 51 aṭangin goal 36-ah a inrawlh tihna a ni. Portuguese manager hian Chelsea-ah pawh Lukaku hi a enkawl tawh bawk.