Silly Point : Advance Cricket World Cup

Zofate thinlunga kan nghahfak Chandamtu pian champhaphak kan lo urlawk a, Sahmulphah Thla vel aṭanga Advance Krismas kan lo hmang lawk ṭhin. Hetiang deuh hian, kumin favang Cricket Calendar chu a bupui ber Khuangchawi thlaa World Cup kan ṭan hmain, a urlawkna Asia Cup chu Sri Lanka leh Pakistan inthlen ṭawm hun chu kan lo thleng ta der mai.

BCCI Power

Asia Cricket Council-in a ruahman lawk angin Pakistan-in Asia Cup an thlen hun a ni. Mahse khawvel Cricket Board a vawk lal len BCCI chuan a team-te Pakistan rama thawn a tum lo bur mai si.

BCCI hnarkaitu general secretary Jay Shah hi, BJP hotupa Amit Shah fapa ni tlat. Khawvel Cricket calender a India tel lo chu a theih loh a ni tawp. Sum leh pai nasa takin a nghawng nghal dawn si a.

Ruai tel loa Krismas Programme siam ang lek a ni dawn. Chuvang chuan ruahmanna thar siamin, Sri Lanka lamin an lo thlenṭawmpui a ngai ta. September 2, Inrinni chawhnu a rawn inher chhuak anga India leh Pakistan te chu, Sri Lanka khawpui pakhat Kandy-ah an inkhuainuai hun a rawn inher chhuak ang.

Indo- Pak

Pakistan Cricket Board tana tun hnaia thil thleng hi theihnghilh mai mai chi a ni dawn lo a, a chhanletna an neih chhun chu khelmual chhungah an ṭhenawm Hindustan hneh hi a ni dawn.

Cricket El Clasico tia sawi ngam India leh Pakistan inkhel tur hi chu group stage-ah a khuh hawn nan an inkhuainuai phawt ang. Tin, result inbarkhaih em em a awm loh chuan Super 4 lamah an intum leh ngei dawn.

Heta che ṭha pahnih an nih phei chuan final a intum lehin. Tun hapta thum chho vel chu khawvel cricket in a lo nghahlel ṭhin El Clasico a hmu zawn chho deuh reng turah ngai ang. Team ṭhangduang Afghanistan leh Bangladesh leh tun hma pha lo insiamṭha mek Sri Lanka te awmna group B pawh hi a ngaihnawm dawn chiang.

India Camp

India head coach Rahul Dravid-a chuan, vawiin Nilainia Sri Lanka pan tura an chhuah hma hian, a naute chu training camp a neihpui. Training camp hi ni nga chhung awh niin August 25-29, 2023 chhung khan neih a ni a, an inkulhna hmun hiKarnataka State Cricket Association ground pakhat Alur a ni.

Jasprit Bumrah hoa Ireland-a inkhel tura zin zinga Asia Cup khel tur player pali - Bumrah, Tilak Varma, Prasidh Krishna leh Sanju Samson te pawhin August 25 khan Ireland aṭangin Bangalore an rawn pan. Player dangte erawh August 24 tlai lamah team hotel ITC Gardenia-ah an in check in hman vek a ni a, player pali dang hian August 25-ah Bangalore thlengin thlengin August 26 aṭangin training an zawm ve bawk.

Ni nga awh training camp Alur-a neih mekah hian official media Star Sports tih loh chu eng mi mah luh phal an ni lo a, Bangalore Police-ten security nghet taka venhimna an pe. Cricket-a mi langsar leh official nazawng pawh Rahul Dravid-a phalna lo chuan tumahin gate pui hi an pel thei lo a, India team hian close door training camp neiin an inkulh hrang.

Thu kan hriat chinah fitness yo-yo test-ah players te an pass vek a, KL Rahul erawh tihrawl na deuh la nei awmchhun a ni. Training hi zing dar 10:00 aṭanga tlai dar 4:00 thleng awh training session hautak tak mai chu ni nga chhung hian an nei a ni.

Squad-a awm player 17 bakah hian batsman ten bowler ṭha tam zawk an hmachhawn theih nan, IPL star leh tum ṭuma thlan tel loh Umran Malik leh midang 13 vel koh tel an ni bawk.

Super Saturday

Rohit Sharma leh Rahul Dravid a hnuaiah hian beisei angin India team hian an la khel ṭha tawk lo a. Stage sanga irhfiak an la ching zeuh zeuh.

Tin, tun Asia Cup hi kan hma lawk World Cup hlim thla ṭha tak a nih dawn avangin, pressure tamtak karah India hi an khel dawn tih a chiang. Cricket tui mite tan chuan Ber thla nghahhlelhawm a ni tawp mai a ni. I lo thlir ang.