Goal sarih nen Atletico Madrid an lam!

Spanish La Liga an ṭan chauh a, result ngaihnawm tak tak hriat tur a awm nghal - Thawhṭanni zan khan Atletico Madrid pawhin chiang zetin Rayo Vallecano an hneh a, khualmualah 7-0 ngawtin an sawp!

Mikhual team hian inthlahrun an tum lo. Antoine Griezmann, Memphis Depay leh Nahuel Molina te chuan minute 36 a tlin meuh chuan goal khat ṭheuh an khung tawh a, 3-0 in chawlhlawkah hma an hruai der.

Second half-ah thawnthu a danglam tam lo - a danglamna chu Atletico-in first half aiin goal khatin an khung tam zawk tih chu a ni deuh mai! Mikhual team tan hian Alvaro Morata chuan goal hnih khungin Angel Correa leh Marcos Llorente ten goal khat ve ve an thawh bawk.

Atletico Madrid hian match thum an khelh aṭangin point sarih an nei ta a, Barcelona nen an point hmuh zat a inang. La Liga club zingah match thuma la chak vek awmchhun chu Real Madrid an ni a, point kua an nei der tawh.

A surin a sur

Rayo khelmualah Atletico an tlangnel nghal viau a, goal khung turin an nghah rei a ngai lo - minute hnihna lekah thiampuipa Griezmann chuan hmahruaina goal a khung a, Rayo Vallecano player-te an inring hman lo.

Rei an rial lo - minute 16-naah Depay chuan theihna sang tak a la nei reng tih pholangin an goal hnihna a khung ve leh a, Manchester United leh Barcelona-a hlawhchham Depay-a'n Atletico-ah tlangnel a zir ṭan hi a bik takin Netherlands tan a hmuhnawm ang.

Hetihrual hian hliam vangin Depay hi minute 35-naah lakchhuah a ni a, Atletico ṭantute lawm a kim lo - chutihrual chuan amaha a chhuah theih avangin hliam na tak ni lo tura ngaih a ni.

Depay chhuah aṭanga minute khat hnu lawkah Atletico hian goal an khung leh nghal a, Molina khung a ni - Atletico goal hmahruai leh Molina goal hi Rodrigo De Paul siamsak a ni a, Saudi club Al Ahli-in lakluh an tum midfielder hian Spanish club tana a ṭangkaina a pholang zel.

A hming Morata

Atletico-in goal thum khung chungin chawlhlawk an hmang a, second half-ah pawh chawlh hahdam an tum lo - Morata chuan minute 73-na leh 84-naah a rawn khung belh a, striker hriam tak a la ni reng tih a pholang.

Kum 30 mi Morata hi nipui transfer-ah Inter Milan, AS Roma leh Juventus te nen sawizawm a ni a, mahse, Atletico Madrid coach Diego Simeone-a'n a duh tlat avangin a chelh - Spain captain hian amah ringtu Simeone-a chhanglet.

Morata goal khung inkarah Correa chuan goal khat a thawh ve bawk a, a hmawr bawk nan Marcos Llorente chuan goal khat a khung leh bawk - hun tawp thlengin goal dang a lut lo a, chiang takin Atletico an chak.

Goal sarih khung a, goal chhuah miah lotu Atletico tan La Liga match bikah khualmuala an chak chian ber ṭum a ni a, kum 2000 hnuah tun hi La Liga match khata goal sarih an khung vawi hnihna chiah a ni bawk.