Hliam vangin Junior chawl dawn

Real Madrid forward ṭha Vinicius Junior chu a malpui hliam vangin a chawlh rih a ngai dawn a, khawthlang chanchinbuten an tarlan dan chuan Spanish club lian tan hian match riat chhung a khel thei dawn lo.

Kartawp La Liga inkhelah Real Madrid hian Celta Vigo an hneh, he inkhelah hian Vinicius hi a hliam. A dinhmun endik a nih hnuah a malpui a hliam tih finfiah a ni a, club leh an ram Brazil tan a inlan thei dawn lo tihna a ni.

Real Madrid chuan thuchhuah siamin, "Vini hi a malpui dinglam tihrawl a hliam a, club chuan a dinhmun hi a ngaichang reng ang," an ti. Chawlhkar ruk vel a chawlh a ngaih dawn avangin Real tan chuan chânna lian tak a tling dawn.

La liga lamah Getafe, Real Sociedad, Atletico Madrid, Las Palmas, Girona leh Osasuna te a hmachhawn thei dawn lo, hei bakah hian Champions League an match hmasa pahnihah a inlan a rinawm loh bawk.

Real tan chauh a ni lo - September thla hian Brazil chuan World Cup qualifier an khel dawn. World champion vawi nga ni tawh hian Bolivia leh Peru an hmachhawn hunah pawh Vini hi a inkhel thei ve dawn lo a ni.

Brazilian forward Vinicius Junior hian Real Madrid tan inelna hrang hrangah match 228 a khel tawh a, goal 60 a khung. Brazil tan match 23 aṭangin goal thum a khungsak tawh bawk.