Bielsa-a'n thu ṭha min hrilh - Nunez

Liverpool striker Darwin Nunez-a'n Newcastle United laka Liverpool 'comeback-na' goal hnih a khung hnuah Argentine coach Marcelo Bielsa hnen aṭanga thurawn a lak thu a sawi.

Kum 24 mi Nunez hian June 2022 khan Benfica aṭangin Liverpool a zawm a, a man pek tlak ngai chin ringawt pawh pound maktaduai 64 a tling. Uruguayan striker Nunez hian beisei a pha lo a, season hmasa berah Premier League-ah goal kua chauh a khung.

Tun season-ah pawh Nunez hian bul a ṭan pha lo a, bench aṭang zelin a lalut. Kar tawpa Newcastle an hmachhawn ṭumin Nunez hi bench aṭangin a rawn lut a, Liverpool hi player 10-a an khelh bakah 1-0 in hnufual mah se Uruguayan striker hian a chakpui.

Nunez chuan, "Zoom hmangin Bielsa nen kan inbia a, kan inkhelh lai video te chu min hmuh a, ka tih dik loh min hrilh. Ka hlawkpui hle," tiin a sawi.

Liverpool striker chuan sawi chhunzawmin, "Klopp hi kan coach a ni a, a thutlukna ka zah. Phun nawi loin rim takin ka thawk a, hun min pek ang te hmang ṭangkai turin theihtawp ka chhuah ang," tiin first eleven a chang lo a nih pawhin a vui loh tur thu a sawi.