Nipui Transfer - Ramos leh De Gea tan club an la awm lo!

Football season chawlh laia ngaihnawm ber ṭhin chu nipui transfer titi leng vel a awm lai hi a ni a, mahni club ṭan zawngte player rim lai chanchin ngaihvenin football fans tam tak chu an phi li ṭhin hle.

Khawvela infiamna en tam ber football-ah sum a tam zel a, chumiin a nghawng chu player man a ni a, player man a tam chak hle - club-in an phu aia tama player an lei chhiar tur a awm ta nawk.

Hetihlai hian an club khelhnaa contract hmang zo leh contract titawp, club bik nei loa awm mek player engemawzat an awm bawk a, chung player-te chuan an duh lam club pan turin zalenna an nei - a bik takin player class sang tak man chawi ngai loa lakluh chu club tam tak tan duhthusam a ni.

Mahse, chutiang a nih mek lai chuan mak takin Paris St-Germain defender hlui Sergio Ramos leh Manchester United-in an chhuah zalen tak David de Gea te chu club nei loin an la awm mek a, khawi lam nge an pan dawn, a la sawi theih loh.

Khawiah nge Ramos?

Real Madrid captain hlui Ramos-a'n club thar a nei mai dawn emaw tih laiin a nei hleithei lo a, MLS leh Saudi Pro League nen pawha sawizawm defender hi Turkish club Besiktas nen indawr mah se, Besiktas hian a hlawh phut tam avanga an lakluh dawn loh thu an puang tawh.

Kum 37 mi Ramos hian PSG-ah khan kum khatah £11.7mtd vel a hlawh nia sawi a ni a, tunah chuan Galatasaray a zawm dawn niin an sawi leh tawh - Turkish club hian kum hnih chhunga euro maktaduai 5.5 vel hlawhtir an inhuam niin an sawi.

Mahse, Ramos hian euro maktaduai 15 aia tlem hlawh a tum lo niin an sawi. Mexican club lar Club America chuan kum khatah €8.5mtd hlawhtir a, kum khat atana contract ziahpui a, kum khat dang pawhsei theiha tih an duh bawk.

Ramos hian Mexican club lakah hian €13mtd tal a phut thung niin an sawi bawk - he thu buatsaih a nih thleng hian a club pan tur lam a la chiang thei lo.

De Gea a free!

Real Madrid-in hliam vanga an keeper chhuanvawr Thibaut Courtois an chân khan De Gea hming a ri a, mahse, Spanish club hian Kepa Arrizabalaga an la tawh - Bayern Munich hming pawh a ri a, mahse, Spanish keeper dinhmun a chiang thei lo.

Saudi club Al Nassr leh Al Ittihad hming pawh a ri ring viau a, mahse, De Gea hian European football-ah tih tur a la neiah a ngai. Chutihrual chuan a beisei ang tak top club-in an la dawr chiah lo niin a lang bawk.

Real Madrid-a hlawhchham Eden Hazard chuan kum 32 mi lek ni chunga inkhelh chawlhsan mai a rilruk nia sawi a ni a, Chelsea legend hian Saudi, MLS leh Ligue 1 club aṭanga sawmna a hmuhte a hnar vek niin an sawi - pound maktaduai 150 thlenga sang chho thei tura Real a pante chu thawnthu an chang ta.

Loan-a a khelhna West Ham-a hming a chher hnuah Jesse Lingard-a'n season hmasa ṭan dawn khan Manchester United chhuahsanin, duhthlan theihna a nei a, mahse, Hammers aiah hlawh pe tam theitu Nottingham Forest a thlang - mahse, tunah chuan club nei loin a awm mek. West Ham-ah training a nei a, an la ngei dawn, tihna erawh a ni lo.

Transfer tawpna

September 1-ah European top five league Premier League, LaLiga, Bundesliga, Ligue 1 leh Serie A ten transfer an khar tawh dawn a, transfer a tawp hun tur dar zat erawh a inang vek bik lo.

Premier League, Ligue 1 leh La Liga te chu September 1 zan dar 11:00-ah a tawp vek dawn a, hei hi India sana chuan September 2, zing lam dar 3:30 tihna a ni - Bundesliga chu European league langsar zinga transfer khar hmasa ber tur niin, September 1, zan dar 9:30-ah khar a ni ang.

Hetihlai hian Serie A chu September 1, zan dar 11:30-ah nipui transfer khar a ni dawn thung. European club-te chawk buai taktu Saudi Arabia transfer hawn chhung a rei deuh hlek a, September 20 thleng hawn a ni dawn.

Mahse, transfer khar hun hian free agent kan tih, club nei lo player-te chu a nghawng dawn lo - an duh huna club zawm turin zalenna an nei.

Mahse maw

Club nei lo player-ten an duh lam club an duh hun huna pan turin zalenna nei ngawt mah se, transfer tawp hun rei tak thleng inngaihtuah erawh a fuh bik lo - league tinin player registration tih fel hun an nei vek.

Premier League-ah chuan club tinin Premier League squad atana an thlan player 25 hming chu September 13 aia tlai loah an thehluh a ngai a, player chuan hemi hmaa club a zawm hman lo a nih chuan thlasik transfer inhawn hun thleng a nghah leh a ngai dawn tihna a ni.

Tun dinhmuna player langsar zingah Juan Mata (Galatasaray), Alfredo Morelos (Rangers), Jerome Boateng (Lyon), Axel Tuanzebe (Manchester United), Roberto Pereyra (Udinese), Andros Townsend (Everton), Andre Ayew (Nottingham Forest), Nampalys Mendy (Leicester City) leh Stevan Jovetic (Hertha Berlin) te chu club nei loa awm mek zingah an tel.

Anni ho pawhin January 1 nghah thlen kher an duh lo a nih chuan an club khelhna tur an tihfel ran a ngai a, muangchang thei an ni lo - transfer bazar a ngaihnawm zel dawn e.