PFA Awards 2023 : Men's Player of the Year Erling Haaland

PFA Awards 2023 chu August 29, Thawhlehni zan khan sem chhuah a ni a, Manchester City treble champion-puitu Erling Haaland chu PFA Players’ Player of the Year atan thlan a ni.

Pep Guardiola hnuaiah Haaland hian record ṭhahnem tak a siam a, City chu Premier League, FA Cup leh Champions League-ah a champion-pui a, tun season-ah UEFA Super Cup an chawi leh tawh bawk.

Norwegian striker Haaland hian Premier League-a a season hmasa berah match 35 aṭangin goal 36 a khung nghal a, season khata goal khung tam ber record a siam.

Kum 23 mi Haaland hian Premier League-ah hattrick vawi li a siam a, FA Cup-ah pawh vawi khat siamin Champions League-a RB Leipzig an sawp ṭumin goal nga tehmeuh a khung bawk.

Season tluanin Haaland hi a rintlak a; PFA Fans' Player of the Month atan August 2022, September 2022 leh December 2022-ahte thlan a ni a, ṭum thum a dawng.

Haaland hi Man City tana a khelhpui Kevin De Bruyne leh John Stones, Arsenal duo Martin Odegaard leh Bukayo Saka bakah England captain Harry Kane te aia thlan a ni.

England pawn player zingah Haaland hi Ruud van Nistelrooy (2001-02 season) hnua Premier League season khatnaa PFA Players' Player of the Year-a thlan hmasa ber a ni a, a hnathawh thlirin chawimawina hi a phu hle.

Norwegian striker hian June 2002 khan Borussia Dortmund aṭangin pound maktaduai 51.2-in Etihad Stadium hi a pan a, season khatnaah inelna hrang hrangah goal 52 a khung nghal. City la champion ngai lohna Champions League-a a champion-pui hi Haaland-a hnathawha ropui berah a ngaih a theih.

Hmeichhe lamah Aston Villa striker Rachel Daly chu PFA Women's Player of the Year-ah thlan a ni a, Chelsea forward Lauren James chu Young Player of the Year-a thlan a ni thung.

"Chawimawina hlu tak ka dawng thei hi lawmawm ka ti hle. Ka elpuiten ka hnathawh min hriatpui hi a lawmawm lehzual a, min vote-tute chungah ka lawm hle. Kei leh kan team tan season chhinchhiah tlak a ni a, treble champion kha ka beisei pha kha ngai lo. Khatiang ti tur chuan team anga ṭhat tlan a ngai. Tunah chuan season kan ṭan leh tawh a, hlawhtlinna ngai chan nawn tumin theihtawp kan chhuah ang."
- Erling Haaland, Man City striker