Vawiinah I Day Football final rematch

Zote Toyota MPL10-ah vawiin hian inkhel hmuhnawm bik hmuh tur a awm dawn. Vawiin chhun dar 12:00 hian Chhinga Veng FC leh Aizawl FC te an inkhel dawn a, I Day Football final rematch-ah hian I League club-in phuba lak an tum dawn a ni.

Lan khatna

Vawiin aṭangin Round 2 khelh ṭan tur ni mah se Chhinga Veng erawh an vawi khat inlanna tur chauh a ni. Round 1-ah player registration fel loh avangin Chhingcows an khel thei lo a, Mizoram Police lakah point thum an chân.

MPL nomawi vawi thum chawi tawh Lalsangzuala Hmar hote'n MPL10-ah bul an ṭan ṭha lo a, Aizawl FC laka an chak lo a nih chuan insiamṭhat a har chho dawn. Hei vang hian Chhingcows tan vawiin inkhela point hlawh chhuah a pawimawh hle.

AFC an inpeih

Aizawl FC coach Victor Lalbiakmawia chuan, "Chhinga Veng dinhmun kan hria, point thum an chân bakah goal thum chhuah ang an ni bawk. Keini aiin point an mamawh a, mahse anni lakah hian point thum hlawh ngei kan tum.

"I Day Football final-a kan hneh loh kha kan rilru a ná a, player-te pawhin Chhinga Veng tum an châk. Tute pawh lut se chak ngei tuma theihtawp chhuah tur vek an ni a, inkhel turin kan inpeih," tiin Vanglaini a hrilh.

I League club hian kil tinah player ṭha an kawl a, player pahnih khat inhliama buai tur an ni lo. Chutihrualin, match hmasa bera Electric Veng an hmachhawn ṭumin an khel a dak ṭha tawk lo a, insiamṭhat an mammawh.

Goal hmaah forward thar Lalrinzuala a hriam chhunzawm zel a, AFC hi ṭha lehzuala khel tur chuan Serchhip tlangval Rinzuala thláwptute hi tun aia goal duha an tuihâl a ṭul ang. Winger R Lalthanmawia leh midfielder Lalramsanga te chu hliam vangin an dinhmun a chiang lo a, an inlan thei lo a nih chuan player dang tan hming chherna hun ṭha a ni thei ang.

Chhingcows ṭha zawk

I Day Football-ah Chhinga Veng an la kim lo a, chutichung chuan an champion. MPL-ah Chhingcows ṭha zawk an inlan dawn a, final-a Aizawl FC hnehtu aiin tun ṭuma team hi an ṭha tawh zawk dawn.

Chhingcows assistant coach Lalremruata chuan, "Vanlalbiaa Chhangte, Zonunmawia, Lalrohlua, Lalsawmzela, Lallawmtluanga leh Ephraim ten min rawn telpui tawh a, Aizawl FC lakah pawh chhawr theih an ni ang," tiin Vanglaini a hrilh.

Vanlalbiaa Chhangte hi a lâr chhuahna MPL-ah a rawn kir dawn a, Chanmari West leh Chanmari FC tana hming chher tawh Hriangtlang winger hi hmuh a châkawm tawh hle. Zonunmawia hi AIFF Elite Academy chhuak a ni a, Chennaiyin FC reserves tan a khel tawh a, midfielder ball sem thiam bik a ni.

Lalsawmzela pawh hian MPL-ah sûlhnu a nei ṭha a, coach Lalsangzuala Hmar player hman thiam tak a ni bawk. Zonunmawia nau Ephraim-a hi wing back a ni thung a, Mizo left back hmabak nei èng zinga mi a ni. Chhingcows hian goalkeeper ṭha RS Lallawmzuala an nei a, tlar hmaah MS Dawngliana leh Suanngaihmuana (Amuana) te an awm sa bawk avangin team ṭha an ni tih a chiang.

MPL10-ah hian Aizawl FC hi ṭha bera ngaitu an ṭhahnem a, I League club hi eng ang chiaha ṭha nge an nih tih chu Chhingcows lakah fiahin a awm dawn.