Coach Rindika hmaah a club hlui Venghnuai

Zote Toyota MPL10-ah vawiin tlai dar 3:00 hian Chawnpui FC leh FC Venghnuai an inkhel dawn a, MPL9 final rematch a ni. Season liam taa Venghnuai final thlenpuitu Lalrindika Hmar-in Chawnpui a zawmsan a, an veng club leh a club hlui laka chak loh hi a hlau khawp ang.

Chawnpui hian MPL nomawi humhim ngei an tum a, season bul pawh an ṭan ṭha. An match hmasa berah Project Veng FC chu 4-1 in an sawp. Hualngohmun tlangval Vanlalthanga'n a theihna a lantir leh tawh a, an goal bawh a nat phah hle.

I Day Football-a beisei an phak loh hnuin Chawnpuiin coach Rindika duh danin an khel ṭan a, club thuneituten an champion ngei theih nan player ṭha an laksak bawk. Chawnpui hi Venghnuai lakah chak tura rinkai zawk an ni.

Football-ah erawh rin lawk ang vekin thil a thleng lo. FC Venghnuai hi match hmasa berah coach K. Lalthlamuana'n a awmpui lo chungin Chanmari lakah 4-3 chauhin an chak lo a, hun tawp thlenga huaisen taka an khelh avangin Chawnpui tan pawh khelh an harsa dawn.

Venghnuai captain C Ramdinmawia'n Chanmari lakah hattrick a siam a, Chawnpui an hmachhawn hunah pawh inrintawkna a neih phah khawp ang. Coach K Lalthlamuana chuan, "Rindika nen kan inhmachhawn leh dawn. CYMA Football-ah khan Salem Veng a enkawl a, keiin Venghnuai ka kaihruai a, semifinal-ah kan vannei ta zawk. Tun ṭumah pawh hian a vannei zawk nih kan duh a, chumi tur chuan ka naute an dam kim bawk," tiin Vanglaini a hrilh.