US Open : Alcaraz leh Murray chak awlsam

Champion lai Carlos Alcaraz chuan US Open nomawi a kawl lai humhim ngei a tum, nimin zinga a bul ṭanna inkhelah Spanish tlangval hian Dominik Koepfer chu awlsam takin a paltlang - a khingpui hi hliam vangin a khel tluan thei lo.

First round inkhel dangah, champion hlui leh world number 1 pawh lo ni tawh Andy Murray pawhin Corentin Moutet a hneh a, set hloh loa a chak thei chu British tlangval tan chanchin lawmawm a ni ang.

Darkar khat

Grand Slam hi chawlhkar hnih chhung khelh a ni a, best of five hmanga chak zawk zawn a nih avangin a tir lama tha khek thiam a pawimawh. Alcaraz tan a khingpui Koepfer-a inhliam chu vanneihna a ni thung.

German tlangval Koepfer hi a ke rek a hliam a, enkawl lailawk a nih hnuah khelh zawm tum mah se a khel tluan thei lo. Darkar khat an inhmachhawn chhungin seeded pakhatna Alcaraz hi 6-2, 3-2 in a chungnung zawk.

Kum 20 mi Alcaraz chuan, "A nihna tak sawi chuan kan khingpuiten hliam an tawrh vanga chak zawk nih hi chu a nuam ngai lo. Koepfer inhliam ka tuarpui a, a lawmawm lai chu kan inkhelh chinah ṭha taka ka khel thei kha a ni," a ti. A match lehpekah chuan South African player Lloyd Harris nen an inhmachhawn leh dawn a ni.

Murray a chak

US Open 2012 champion Murray pawhin darkar hnih leh minute 58 chhungin Corentin Moutet chu 6-2, 7-5, 6-3 in a hneh. Murray hian seeded 19-na Grigor Dimitrov a hmachhawn leh dawn a, a harsa deuh tawhin a rinawm.

Grand Dlam vawi thum champion tawh Murray hi tun hnaiah a pum lam chiang lo vangin a inkhel tam lo. US Open hma hian tournament pahnih aṭangin a inhnukdawk a, inkhel hah loa a awm chu chhawr ṭangkai a tum tih a sawi thung.

Kum 36 mi Murray chuanm "Corentin Moutet kha player danglam tak a ni a, min beih dan tur kawng hrang hrang a hre thei hle. A pawimawh lai chu set hloh loa ka chak thei kha a ni," tiin a sawi a, a service kawngah harsatna a tawk lo tih a sawi bawk.

Inelna lian Grand Slam champion nih a harsa a, match khat lek chak pawh thil awlsam a ni lo - major tournament bikah Murray hi vawi 200 a chak tling ta chiah, hetiang dinhmun thleng thei player pakuana a ni.

Inkhel dang

Daniil Medvedev pawhin champion thei zinga mi a ni tih a takin a lantir. Thawhleh zan inkhelah Attila Balazs chu darkar khat leh minute 14 chhung lekin 6-1, 6-1, 6-0 in a sawp, a chet dan hi Novak Djokovic leh Alcaraz te tan pawh ngaihven tham a ni.

Russian tlangval hian kum 2021 khan New York khawpuiah hian hlawhtlinna a lo chang tawh. Clay leh grass court lama a khelh ṭhat vak loh pawhin hard court-ah chuan player hlauhawm a ni ṭhin, a bik takin US Open hi a khel thiam hle.

Kum 27 mi Medvedev chuan, "Set thum ka khelh tawh zinga rei lo ber a la ni a, ka tan chuan a lawmawm hle," a ti. Medvedev hian tun dinhmunah chuan Djokovic leh Alcaraz te chu an ṭha bik an nih thu a sawi a, chutihrualin midang pawhin an hneh thei tih a sawi bawk.

Inkhel dangah seeded 11-na Karen Khachanov erawh tualchhung tlangval Michael Mmoh lakah 6-2, 6-4, 6-2 in a chak lo. Grigor Dimitrov, John Isner, Hubert Hurkacz, Jannik Sinner, Andrey Rublev leh Alexander Zverev te pawh an chak vek a ni.