Ronaldo hoin Al-Nassr an chak

Cristiano Ronaldo leh Sadio Mane te awmna Al Nassr chuan Saudi Pro League lamah pawh goal an khung chhunzawm zel. Thawhlehni zan inkhelah Al Nassr hian Al-Shabab chu 4-0 in an sawp.

Al Nassr tan Ronaldo hian penalty aṭangin goal hnih a khung a, a penalty pahnih inkarah hian a goal pakhat chu pawmsak a ni lo. Portugal captain hian penalty bawk khung theihna a neih chu Abdulrahman Ghareeb a kian a, ani hian a hlah thung.

Ronaldo-a goal hnih bakah Mane leh Sultan Al-Ghannam te chuan goal khat ve ve an khung bawk, an league match hmasa pahnihah che fuh lo mah se tunah chuan a zawnin hnehna an chang ve leh ta a ni.

Inkhel dangah Al Ahli chuan Al Tai 2-0 in an hneh. Manchester City forward hlui Riyad Mahrez chuan goal a khung a, a siamsaktu chu Newcastle United winger hlui Allan Saint-Maximin a ni thung.

Mahrez hian goal a khung bakah Franck Kessie tan a siamsak a, match li an khelh tawh chinah la chak vekin point 12 an nei a, team 18 inel zingah pahnihna an ni - anmahni ang bawk hian Al Ittihad chu an la chak vek bawk.