Mixed Martial Arts-ah Mizo tlangval an che ṭha

3rd Indian Open MMA Championship khelh zawh takah Mizoram State Mixed Martial Arts Association (MISMA) team-te chuan gold medal pakhat leh bronze medal pakhat an rawn hawn.

August 24 - 29 inkara neih inelnaah hian Mizoram aṭangin fighter pali an inlan a, Zemabawk tlangval Nazareth Lalṭhazuala chuan senior flyweight-ah gold a hlawh chhuak.

Bhopal khawpuia neih inelnaa gold hlawh chhuak turin Nazareth-a hian round of 16-ah Arunachal Pradesh fighter Donyi Polo chu technical knockout-a hnehin, harsatna a tawk lo. Quarterfinal-ah Bhavesh Dabgoria, Madhya Pradesh chu unanimous decision-a hneh zuiin, semifinal-ah Mizo fighter tho Lalhmangaihzuala hmachhawnin UD thoin a hneh a, final-ah pawh Assam fighter ṭha Abhijeet Tripura chu UD-a hnehin a champion.

Senior flyweight semifinal-a chak zo ta lo Hmangaiha'n quarterfinal-ah triangle choke submission hmangin Rajasthan tlangval Sandeep Bhagel a hneh thei a, mahse, semifinal-ah Nazareth-a tawngin a vanduai zawkah a ṭang ta a ni.

Hunthar tlangval Israel Lalrinawma'n junior flyweight-ah quarterfinal thleng mah se, split decision-in a chak zo lo a, junior welterweight-a inlan HMS Dawngzuala'n quarterfinal a paltlang zo lo bawk - Mizo fighter palite hi coach Jonathan Lalduatliana, Falkland chuan a hruai.

Flyweight national champion vawi hnih ni ta Nazareth-a hi November, 2023-a Serbia-a neih tur Amateur MMA World Championship atan thlan nghal a ni a, ani bakah hian Chite veng tlangval Zarmawia, national championship-a weight division pathuma champion thei record siamtu chu Serbia-ah hian a kal bawk ang.