Match hmasa berah Venus Williams chak lo

Venus Williams tan US Open 2023 chu mangchhia ang mai a ni. American legend hian nimin zing khan a match hmasa ber a khel a, amah ang bawka seeded chang phak lo Greet Minnen lakah 6-1, 6-1 in a chak lo.

Venus hi a vanglai chuan khawvel player ṭha berte zinga mi a ni phak. Grand Slam bikah pawh vawi sarih ngawt a champion tawh, mahse kum 43 mi ni tawhin tunah chuan a vanglai a liam tawh - inkhelh la chawlhsan chiah lo mah se result ṭha a nei thei ta lo a ni.

Tun dinhmuna world number 410 Venus hi a tir aṭangin a khel ṭha lo, qualifier kaltlanga invaw tling Minnen zawkin inkhel a thunun hneh hle a, set hnih an khelhah hian Blegian player hian game khat ve ve chiah a hloh hial.

World number 1 hlui Williams chuan, "Tun tournament chauh ni loin, season pumpui mai hi ka tan a fuh tawk lo vek. Wimbledon zawh hnu kha chuan ṭha takin ka khel chho ve leh thei tawh dawn emaw ka tia, mahse a harsa tawh a ni," a ti.

Inkhel dangah Ons Jabeur chuan thawk lama harsatna a tawk chungin hnehna a chang hram. Louis Armstrong Stadium-a inkhelah Wimbledon finalist hian Camila Osorio chu 7-5, 7-6 (7-4) a hnehin second round a lut.

Set khatna an khelh laiin kum 29 mi Jabeur hi enkawl lailawk a ngai, thawk lama harsatna a neih avangin damdawi lam thiam ten an enkawl hnuah a inkhel chhunzawm leh thei a, a tawpah a chak leh ta tho a ni.

Tunisian nula Jabeur chuan, "Hrileng ka kai a, inkhelh pawh a harsa khawp mai. Tun hmain Asthma ka lo nei tawh, chuvangin tun ṭum zet chu thawk a harsa khawp mai," tiin a sawi a, season hmasa US Open finalist hian Linda Noskova a tum leh ang.

Seeded pahnihna Aryna Sabalenka pawh a chak. Belarus nula hian a bul a ṭan fuh lo, a service hmasa pahnih hloh mah se Maryna Zanevska lakah 6-3, 6-2 in a chak ta tho a, a insiamṭha hma chu a vanneih phah ta a ni.

Kum 25 mi Sabalenka chuan, "A tir lamah double fault vawi thum ngawt mai ka nei a, a bul ṭanna kha a chhe takzet a ni. Mahse, dawhthei takin ka nghak a, game lina kan khelh kha chuan nuamti takin ka khel thei ṭan tawh, set hnihna phei chu a harsa tawh lo," a ti.

Inkhel dangah seeded pathumna Jessica Pegula, Wimbledon champion Marketa Vondrousova, Ukraine player Elina Svitolina leh American nula Madison Keys te chuan an khingpui ṭheuh hnehin first round an paltlang bawk.