Chhinga Veng lakah Aizawl FC an vannei

I League club Aizawl FC-in I Day Football final-a an hneh loh Chhinga Veng FC lakah phuba lak an tum a, an beisei ang ngawt a ni lo. Chhingcows-in ṭum hnih ngawt hma an hruai a, Aizawl FC-in si phurh an sut hram, 2-2 in an inhnehtawk. Goal hnuhnung ber a luh zawhah hun a tawp nghal.

Zote Toyota MPL10-ah nimin chhun khan inkhel hmuhnawm bik chhawpchhuah a ni a, chhun pachanga khelh a ni nachungin football class sang phochhuah a ni. Lalsangzuala Hmar kaihhruai Chhingcows-in an goal an humhim theih loh avangin match hnih aṭangin point khat chauh an hlawh chhuak.

Thawnthu hlui

I Day Football final-ah Aizawl FC-in champion ngei an tum a, kum hmasa lam final-a Mizoram Police an hneh loh avangin Chhinga Veng hneha nomawi chawi an tum hle.

Mahse, Sanga Hmar hoten tum dang an lo nei a, an vannei tel bawk. Injury time-ah pawh hun tawp hma chiahin Lalnunzira'n (Zirtea) a ti goal a, 2-2 a ni. Penalty shootout-ah Chhinga Veng an vannei zui.

Thawnthu thar

Aizawl FC-in phuba lak an tum a, an beisei ang erawh a ni lo. Chhinga Vengin goal an khung hmasa zawk. Corner kick aṭanga ball per chhuak chu Isac Zomuanpuia'n ṭha zetin minute 11-naah a pet goal.

Goal chhuah hnuah Aizawl FC an insiamrem hma a, player class danglamna a lang bawk. K. Lalrinfela'n (Mafela) nalh zeta petna tur khawp a siam hnuah mawi zetin minute 19-naah a khung.

I League club chungnung zui mah se first half-ah a goal belh lo. Second half-ah Chhinga Vengin Zonunmawia leh Vanlalbiaa Chhangte te an luhtir a, first half ang thoin inkhel a hmuhnawm.

AFC midfielder C. Lalmuanpuia'n box chhung aṭangin ṭha zetin a volley a, keeper RS Lallawmzuala'n a dang ṭha hle.

I League club-in Laldanmawia, Augustine Lalrochana leh Hmangaihkima te a rualin an luhtir a, goal khung tum mah se goal an chhuah ta zawk. Minute 72-naah Suanngaihmuana'n AFC defender Lalmuanawma a bum hnuin MS Dawngliana a pe a, Dawngtea pet hi goal lo mah se a per chu Isaac Malsawmkima'n goal-ah pet lehin crossbar a per a, hemi per hian AFC keeper Hriatpuia hnung fuhin goal-ah a lut.

I League club-in si phurh sut tumin Rohmingthanga Bawlte an luhtir a, danglamna a thlen lo. Chhinga Vengin Aizawl FC an hneh nawn turah a ngaih theih a, mah se I League club an tlawm duh bik lo.

Injury time-ah pawh minute sarihnaah Danmawia vawrhluh chu Lalbiakdika'n a tauh goal. Hun a tawp zui a, 2-2 in inkhel a tawp. Champhai Zotlang tlangval BD-a hi man of the match a thlan a ni.