Rankai zinga mi pahnih an tla!

Stefanos Tsitsipas leh Casper Ruud te chu US Open champion tura rinkai zinga mi ni phak mah se, second round lekah an khingpui hneh loin an zinkawng a tawp nghal - a vawi khat nana Grand Slam title lak an tumna chu a thlawn leh ta rih a ni.

Nimin zing inkhelah erawh Novak Djokovic chuan Bernabe Zapata Miralles hnehin third round a inhlangkai thung a, match hnih a khelh tawh chinah Serbian star hian harsatna a la tawk lem lo.

Tsitsipas leh Ruud

Nilaini zan second round inkhelah Tsitsipas hian world number 128 Dominic Stricker chu 7-5, 6-7(2), 6-7(5), 7-6(6), 6-3 in a ngam lo, set nga hi darkar li leh minute li chhung an khel - Greek tlangval hi tawnhriat nei ṭha viau tawh mah se a ruh a no ta zawk.

Seeded pasarihna Tsitsipas chuan, "Ka dinhmunah hian midang dem tur an awm lo, ka team chhung leh pawn lama ruahmanna siamtu zawng zawng pawh dem tur an awm lo, mawhphurtu pumhlum chu keimah ka ni.

"Tennis court chhungah khan engkim mai kha ka kutah a awm a, mahse ka tihlawhtling thei ta lo a ni," tiin a sawi. Thla 12 chhung nomawi a chawi loh hnuin Mexico-ah a hlawhtling zui a, a boruak ṭha hi a chhawm nung leh thei ta rih lo.

Inkhel dangah seeded pangana Ruud chu world number 67 Zhang Zhizhen lakah 4-6, 7-5, 2-6, 6-0, 2-6 in a chak lo. Chinese tlangval hian Wimbledon-ah khan set nga khelin a chak lo zawk a ni a, tun ṭuma set nga khelh lehnaah erawh a vannei zawkah a ṭang.

Kum 26 mi Zhang chuan, "Set nga khelh hi chu a boruak hi a danglam thei hle, set tin mai kha awlsam a awm lo. Set linaah phei kha chuan game ka la miah lo, a tawpa ka chak dan kha chu vanneih vang a ni," tiin a sawi.

Djokovic a chak

Player langsar leh a ṭha ṭhenkhat chesual awm mah se, world number 2 Novak Djokovic erawh a chesual ve lo. New York khawpuia inelna neihah hian third round thleng loa tlak a la nei ngai lo, a record ṭha hi a la chhawmnung zel.

Serbian star hian darkar hnih chhung lekin Bernabe Zapata Miralles chu 6-4, 6-1, 6-1 in a hneh, world ranking chhuak thara number 1 ni mai tur hian match hnih a khelh tawh chinah chuan set a la hloh miah lo a ni.

Kum 36 mi Djokovic hi a match lehpekah chuan amah ang bawka Serbian mi Laslo Djere nen an intum dawn. Inkhel dangah Djere hian Hugo Gaston chu 6-1, 6-2, 6-3 in a lo hneh ve bawk a, seeded 32-na a nih phak ve tho avangin an inkhel tur hi a hmuhnawm ang.

Djokovic chuan, "Tun hnaiah Laslo Djere a khel ṭha thei hle. Inelna lian US Open anga Serbian player pahnih kan intawng thei tur hi ram leh hnam tan a lawmawm a, a tu zawk pawh chak ila Serbia an lawm ang," tiin a sawi.

Inkhel dangah Taylor Fritz chuan Juan Pablo Varillas 6-1, 6-2, 6-2 in a hneh a, seeded 10-na Frances Tiafoe leh Ben Shelton te pawh an chak a, seeded 14-na Tommy Paul chuan set hnih a hloh hnuah Roman Safiullin a hneh let ve bawk.