Serie A club tan team training a neih theih

Thawhlehni zan khan Italy sports minister Vincenzo Spadafora chuan Serie A club-te chuan team training an neih theih tawh thu a sawi a, league khelh chhunzawm hun turah erawh thutlukna an la siam thei lo thung.

Italy rama damdawi lam thiam ten ruahmanna an siam dan chuan, training dawnah player leh coaching staff zawng zawng endik vek an ni ang a, coronavirus kai an awm chuan team pumpui chu ni 14 chhung khung hran an ni ang.

Italian football federation (FIGC) lam chuan team pumpui ni loin, player mal chauh khung hran an duh thung - an ngaihdan a thuhmun loh avang hian team training an neih theih hun tur hmasaah pawh an training rih lo; tunah erawh sorkarin FIGC duhdan ang a kaltlangpui dawn.

Spadafora chuan, "Scientific Technical Committee chuan training chhunzawm a nih theih nana FIGC ruahmanna chu an pawnsak, training an nei thei dawn ta hi chanchin ṭha leh lawmawm tak a ni," a ti.

March 9 aṭang khan Serie A hi chawlh lailawk a ni a, tuna sorkar ruahman dan chuan June 14 thleng infiamna leh mipui punkhawmna chu khap a ni rih. Serie A club-te hian May 4 aṭang khan mimal training chu an kalpui tawh a, nimin aṭang khan team ṭhenkhat chuan a huhoin training an nei ṭan.

FIGC president Gabriele Gravina chuan, "Serie A khelh chhunzawm a nih leh theih nana hmalak a ni hi a lawmawm, kawng dik kan zawk mek niin ka hria," a ti. Serie A club inhmukhawm chuan league khelh zawh ngei an duh thu hi an lo tichiang tawh bawk.

Italy sports minister Spadafora hian league khelh chhunzawm hun tur chungchang chu May 28-ah an sawiho tur thu a sawi. Spadafora bakah hian FIGC president Gabriele Gravina leh Lega Serie A chief Paolo Dal Pino ten thutlukna an siam ang.

 Italian Players’ Union president Damiano Tommasi chuan league khelh leh hmain inbuatsaihna neih ṭhat a pawimawh thu a sawi ve thung. Tommasi chuan, "A ṭha berah chuan chawlhkar ruk tal training nei hmasa thei phawt ila, a rei lo berah kar li tal chu kan neih a ngai ang, chu chuan player inhliam nasa lutuk tur a ti ziaawm thei ang," tiin a sawi. 

Thawhlehni khan Juventus chuan training hi an nei nghal a, forward Cristiano Ronaldo pawh Juventus Training Centre-ah a inlan. Ballon d'Or vawi nga dawng tawh hi an ram Portugal-ah a haw a, chumi hnuah Turin-ah hian kir lehin, training a zawm hmain a hriselna dinhmun endik hmasak a ni.

Ronaldo-a'n Juve tana match a khelh hnuhnung ber chu March 8 daih tawh kha a ni. Allianz Stadium-ah a hmuna entu awm loin an mikhual leh elpui ni bawk Inter Milan chu 2-0 in an hneh, a hnu lamah erawh hri leng vangin league an chawl lailawk.

Turin club hian a zawna a vawi kua (9) nan Serie A nomawi chawi leh an tum mek a, league hmahruaitu an ni. Pahnihna ni lai Lazio nen an inkarah point khat chiah a la awm a, nomawi humhim turin kawng dik zawh mah se hmabak paltlang tur an la ngah ang reng hle.