Sawmfela leh Fakzuala ten bul an ṭan ang - Police coach

Zote Toyota MPL10-ah vawiin chhun dar 12:00 hian RG Stadium-ah Electric Veng FC leh Mizoram Police te an inkhel dawn. I Day Football-ah group khatah an awm loh avangin team pahnih hi tun season-ah a la inhmachhawn lo a, an inkhelh dan tur hriatthiam a har hle.

Police hi match hmasa berah Chhinga Veng hrem vanga inkhel loin, 3-0 a chakah puan an ni a, hemi ṭum hian inhliam vanga training mumal thei lo Malsawmfela leh captain Lalfakzuala te chu bench-a awm tur an ni.

Coach Lalbiaksanga Colney chuan, "Sawmfela leh Fakzuala ten bul an ṭan dawn. Electric Veng hian kum naupang an kawl hnem a, an chet ran bakah an taimak bawk avangin fimkhur taka kan khelh a ṭul ang," tiin Vanglaini a hrilh.

I Day Football-ah khan Police-in nomawi humhim lo mah se game ṭha tak an khel a, Sawmfela leh Fakzuala te hi an la ṭangkai hle. Sawmfela hian goal hnih a khung a, goal luhna turah a inrawlh hnem. Fakzuala pawhin goal thum a khung ve bawk.

Electric Veng erawhin I Day Football-ah hneh an nei lo a, MPL10-ah chak hmel an la hmu lo bawk. Amaherawhchu MPL10 match hmasa berah Electric Veng hian game rang ṭha tak an khel a, pressure an pek ṭhat avangin Aizawl FC meuh pawhin chance an insiam hleithei lo. Police tan pawh Electric Veng hneh hi a awlsam ring suh.