En châkawm Chanmari hmaah Project Veng

Chanmari FC-in nipui bazarah 'champion zia' an chhuah a, MPL10-a club en châkawm ber zinga mi an ni leh ta. Vawiin tlai dar 3:00 hian MPL vawi hnih champion tawh Chanmari hian kai thar Project Veng FC an hmachhawn ang.

MPL-ah hian season hmasa ber aṭanga tun thlenga chhum lo chat loa la tel chu Chanmari FC leh Aizawl FC te chauh an ni. Mizoram football inelna sang berin tun dinhmun a thlen theihna kawngah pawh Chanmari FC hi an pawimawh hle.

MPL10-ah pawh Chanmari FC-in thawm an nei ring leh ta a, AC/DC hla Thunderstruck hmanga Lalkhawpuimawia (Mapuia) an tlangzarh hnuah an thawm a ring zel. Kelkang striker Mapuia hian I Day Football-a goal thum a khung hnuah MPL-a a match hmasa berah goal a khung nghal.

Chanmari FC-in tlarhma tihchak nan R. Laldanmawia an la lut a, Sialhawk Express hi a hmuhnawm nghal. Amaherawhchu Danmawia hi Venghnuai an hneh ṭuma hnawhchhuah a nih avangin Project Veng lakah a inlan thei dawn lo.

Mahse, hmel thar hmuh tur an awm. MPL-ah vawi li champion tawh Zothanmawia (T. Mawia) chu Gokulam Kerala aṭangin an la lut a, nipui bazara transfer lian berah a ngai theih. Match hmasa bera goal li chhuahtu Chanmari hian Project Veng lakah goal chhuah loh an tum dawn.

MPL club hlun Chanmari hian T Mawia bakah tlarhnung tihchak nan MPL best player ni lai Lalrinchhana Tochhawng an la lut a, MPL season hmasa panga kha Rinchhana hian CFC-ah a khel - a mikhual lo.

Chanmari khingpui tur Kolasib club hian I Day Football-ah point an hmu lo a, MPL10-ah chak loin bul an ṭan. Aizawl khaw pawn club tan MPL khelh a harsa ṭhin a, chutihrualin anmahni aiin Chanmari FC-in pressure an nei ngah zawk.

Project Veng tan Chanmari laka point hlawhchhuah hrim hrim hi result ṭha a ni ang a, K. Malsawmkima hote erawh point thum an hmu lo a nih chuan an lawm lo ang.