A zawnin Chelsea an chak ve ta

Nilaini zan khan Chelsea chuan League Cup second round-ah 2-1 in AFC Wimbledon an hneh a, tun season-a a vawi khat nan a zawnin hnehna an chang - an hneh tak team hi League Two club an ni a, uanpui viau chi erawh a ni lem lo.

Stamford Bridge-a inkhelah rin loh takin Wimbledon lam hian goal an khung hmasa a, James Tilley chuan minute 19-naah penalty aṭangin a chhuih lut.

Mahse, Chelsea hian chawlhlawk hman hmain si phurh an sut a, Noni Madueke chuan first half hun pek belhah penalty hmangin a khung - Enzo Fernandez chuan second half-ah khung belhin, 2-1 in Blues an chak.

A awlsam lo

Chelsea-in an league match hmasa pahnihah hnehna an chang zo lo a, point khat chiah an hlawh chhuak. Match thumnaah insiamṭhain Luton Town chu 3-0 in an sawp a, Wimbledon lakah pawh harsatna nei loa chak mai tura ngaih an ni.

Mahse, football hi chu ngaih ang ngawt a ni ṭhin lo. Chelsea goalkeeper Robert Sanchez a chesual a, freekick aṭanga ball kal hnekchhuah a tumna lamah Harry Pell lakah a foul a, penalty a chawi.

Mikhual team tan Tilley chuan penalty hi harsatna awm loin goal-ah a chantir a, Stamford Bridge a ngawihtir - team pahnih inkarah team 63 ngawt an awm tih ngaihtuah chuan Chelsea tan mahni muala goal chhuah hmasak hi a zahthlak.

A hunah tak

Chelsea-in League Two club an mikhual miau avangin an ṭhat dan berin an inrem lo a, chutihrual chuan mahni muala chak lo tur an ni lo - khelmual sirah coach Mauricio Pochettino a au nasa a, Argentine coach hi a hlauthawng tih hai rual a ni lo.

Mahse, Blues-in chawlhlawk hman hmain penalty an hlawh chhuak ve leh a, January-a PSV Eindhoven aṭanga Chelsea pantu Noni Madueke chu Wimbledon centre back Alex Pearce chuan a titlu a, penalty a chawi.

Madueke hian a penalty hlawhchhuah hi harsatna nei loin goal-ah a chantir a, 1-1 a ni. Chelsea-in siphurh an sut hian first half hun pek belh a ni tawh a, phur rit lutuk loin chawlhlawk an hman theih phah.

A tawpah Chelsea

Wimbledon-in hma an hruai lai pawhin tlarhnung ven ringawt thupuiah an nei lo. An vanneih zan ni se, goal dang khung belh thei an ni. Mahse, forward Josh Davison-a khungna remchang chu Levi Colwill chuan a lo tibuai hman a, Ali Al Hamadi pawhin chance a hlah.

Poch-a'n khawmuanna chi a ni tawh lo tih hriain Malo Gusto leh Enzo te a luthtir a, inkhel boruak a danglam. Minute 72-naah Enzo hian mamawh chhanna a ni, tih pholangin hmahruaina goal a khung.

Enzo hian chance dang pawh a nei a, mahse, hun tawp thlengin goal dang a lut tawh lo. League Two club lakah 2-1 in Chelsea an chak - League Cup third round an lut a, Poch-a hoin nomawi chawi an beisei ang.