MPL10 hmahruaitu Chawnpui FC

MPL champion lai Chawnpui FC-in I Day Football-ah knockout thleng pha lo mah se MPL10-ah season bul an ṭan ṭha. Lalrindika Hmar hote hian nimin khan FC Venghnuai 3-1 in an hneh a, match hnih aṭanga point ruk hmuin league hmahruaitu an ni mek.

Nimin tlai RG Stadium-a inkhelah Chawnpui an chungnung zawk a, Vanlalthanga ball vawrh luh ṭha ṭhin mah se goal hmaah an hriam tawk lo.

Chawnpui an vannei - injury time-ah hun ṭha an nei a, K. Lalrosanga'n a hun ṭha neih a bawhpelh lo. Second half-ah nuam sa takin Chawnpuiin bul an ṭan a, mahse minute 52-naah keeper John Lalruatfela'n Venghnuai midielder T. Vanlalruata ball vawrhluh satliah chu a man pial a, a goal.

Venghnuaiin Chawnpui laka point hlawhchhuah theih an inbeisei a, mahse an player hlui VL Thanga an dang thei lo. Minute 76-naah Peter-a ball pek chu Thanga'n la lutin chiang zetin a pet goal.

Chawnpui an phur chhunzawm a, minute hnih hnuah Rosanga'n box chhungah mawi zetin a pet goal a, 3-1 a ni. Hun tawp lamah Venghnuai an khel ṭha a, na takin Chawnpui nawr bet mah se goal an hlawh chhuak tawh lo. Coach Rindika'n a club hlui leh an veng club FC Venghnuai 3-1 in an hneh.