Aizawl FC main sponsor tur Trajon

I League club Aizawl FC chuan August 29 khan Trajon India company-te nen thawhhona thuthlung an ziak a, Delhi-a hmunpui nei Trajon hi Mizo club tan main sponsor a ni dawn a ni.

Royale Lalawi conference room, Khatlaah pawl aiawhten thawhhona thuthlung an ziak a, Aizawl FC aiawhin club director Vanlalfelpuia Royte leh Freddy Lalnunsanga ten hming an ziak a, Trajon India aiawhin company neitu Sushanta Deb leh Akash Das te chuan hming an ziak ve bawk.

Ruahman dan chuan Trajon hian season khat chhung atan Aizawl FC hi an sponsor phawt ang a, a ṭul dan a zira pawhsei zel theih turin thu dah a ni bawk.

I League season thar hi October aṭanga khelh ṭan tura ruahmanna siam a ni a, club 13 an inlan dawn . I League champion RoundGlass Punjab chu ISL-ah kai sangin, Delhi FC leh Shillong Lajong te chu second division aṭangin I League khel turin an kaisang thung.

Hetihlai hian AIFF-in club hmun ruak a lilam aṭanga chhangtu panga aṭangin club pahnih an inlan dawn a, Varanasi-a hmunpui nei Inter Kashi leh Ludhiana club Namdhari FC te an ni ang.

Anni bakah hian AFC, Churchill Brothers, Gokulam Kerala, Mohammedan SC, Neroca, Rajasthan United, Real Kashmir, Sreenidi Deccan leh Trau te chu I League club ni sa, inlan tur an ni.