West Bengal-ah Mizoram Sub Jr team feh chhuak

Sub Junior Boys’ National Football Championship 2023-24-a Mizoram aiawh turte chuan vawiinah an training-na hmun Kolasib aṭangin inelna neihna hmun tur West Bengal an pan. Mizoram team hi coach tawnhriat nei ṭha HC Zarzoliana'n a hruai dawn.

Inelna hi West Bengal-a khaw pahnih Malda leh Berhampore-ah te khelh a ni dawn. Mizoram hi group C-ah Kerala, Maharashtra leh Odisha te nen an awm ho a, group khat aṭangin a tiṭha ber chauhin semifinal an lut dawn.

Mizoram hian September 4, Thawhṭanni hian Maharashtra an hmachhawn ang a; Kerala (September 6) leh Odisha (September 8) te an hmachhawn leh bawk ang.

Mizoram coach HC Zarzoliana chuan, "Champion loh chu kan ngaihtuah lo," tiin nomawi nen ngeia lo haw an tum thu a sawi.

Mizoram aiawha Sub Junior Team-a tel turte hi Sports & Youth Services enkawl RSTC, Saidan-a mi te an ni a, SYS coach Lalthawmmawia (Mamawia) hnuaia inchher hriam sa an ni.