Mizoram team-in Odisha an pan

Hero Junior Boys' National Football Championship for Dr BC Roy Trophy 2023-24 khel turin Mizoram team chuan Nilaini khan Aizawl an chhuahsan a, an tum anga an kal tluan theih chuan September 2-ah inelna neihna hmun tur Bhubaneswar, Odisha an thleng ang.

Mizoram team hi Rochhing-puia (head coach) leh Lalrozama Fanai (coach) ten an hruai a, group A-ah Karnataka, Jharkhand leh Maharashtra te nen an awm ho a ni.

Inelna hi September 5, Thawhlehni aṭangin Bhubaneswar, Odisha-ah khelh a ni dawn. Team 16 chu group paliah pali zela ṭhen darh an ni a, a sang ber chauhin semifinal an lut dawn.

Mizoram coach Chhinga chuan, "Theihtawp chhuahin kan inbuatsaih a, nomawi rawn hawn ngei kan tum," tiin Vanglaini a hrilh. MFA Ground, Sairang Dinthar-ah Mizoram team hian training an nei a ni.

Mizoram hian September 5, Thawhlehni hian Jharkhand an hmachhawn ang a, Maharashtra (Sept 7) leh Karnataka (Sept 9) te nen an inkhel leh ang. Semifinal hi September 13, Nilainia khelh tur a ni a, final hi September 15, Zirtawpnia khelh leh tur a ni ang.