PSV-in Rangers an hneh Champions League an khel dawn

Nilaini zan khan Champions League playoff round second leg match hnuhnung zawk khelh a ni a, inkhel ngaihven hlawhah PSV Eindhoven chuan 5-1 in Rangers an sawp - Scottish club tan Champions League beiseina a bo a, PSV-in European football-a club inelna sang ber an khel dawn thung.

Champions League playoff first leg-a team pahnih intawn ṭumin 2-2 in an inhnehtawk a, PSV khelmualah beiseina sang tak nen Rangers an leng lut - an beisei ang result erawh an hawn thei lo, 5-1 in an tlawm a, inkhel pahnih belhkhawmah 7-3 in PSV an chak!

Dutch club tan Ismael Saibari chuan goal hnih khungin, 2-0 in hma a hruaipui a, Rangers tan James Tavernier chuan minute 64-naah si phurh a sut ṭhen a, beiseina thar an nei.

Mahse, Rangers beiseina neih chhung a rei lo - minute hnih hnu lawkah Luuk de Jong chuan a khung belh a, Joey Veerman chuan sawisel theih taka belhchhahin, Rangers centre back Connor Goldson chuan an lamah a tilut bawk.

Hun a tawp meuh chuan 5-1 in PSV an chak a, Champions League group stage khel turin an inpetkai - Rangers erawh Europa League group stage lamah an tla a, Champions League an khel dawn rih lo.

Hetihlai hian Royal Antwerp chuan Champions League hming a put hnua a vawi khat nan European football-a club inelna sang ber an khel dawn a, AEK Athens chu khualmualah 2-1 in an hneh.

Team pahnih intawn hmasakah Antwerp hian 1-0 in hnehna an lo chang tawh a, second leg-ah 2-1 a chakin, inkhel pahnih belhkhawmah 3-1 in an chak - Belgian club tana Gyrano Kerk goal hmahruai khung chu Greek club tan Sergio Araujo chuan minute 90-naah a sut.

Athens khawpui hlim chhung erawh a rei lo. Hun pek belhah Michel-Ange Balikwisha chuan Belgian champion tan a khung leh a, 2-1 a hnehna changin, chiang takin an tlang.

FC Copenhagen chuan 1-1 in an mikhual Rakow Czestochowa an chelh a, first leg-ah 1-0 a hnehna an lo chan tawh avangin 2-1 in an tlang. Danish club tana Denis Vavro goal hmahruai khung chu Polish club Rakow tan Lukasz Zwolinski chuan chhanglet mah se, first leg-a an tlawm tuarin, Copenhagen zawkin Champions League an khel dawn ta a ni.

Thawhlehni zan khan Champions League playoff second leg hi lo khelh tawh niin Young Boys, Galatasaray leh S.C. Braga te an lo chak tawh bawk a, Champions League khel tur a chiang kim - nizan khan draw neih a ni a, he thu buatsaih a nih lai hian group ṭhen dan kan hre hman lo.