Duhthusam a thleng dik - Wozniacki

Tennis a chawlhsan hnua lo kir leh Caroline Wozniacki chuan US Open third round a inhlangkai. Inkhel hmuhnawm takah seeded 11-na Petra Kvitova chu 7-5, 7-6(5) a hnehin second round a paltlang a ni.

Wozniacki hian kum 2020 khan tennis a chawlhsan, fa pahnih a neih hnuah lo kir lehin Montreal Masters leh Cincinnati Open-ah erawh a match hmasa berah a chak ve ve a, tunah chuan inelna lianah result ṭha a nei ve leh ta.

Kum 33 mi Wozniacki chuan, "New York khawpuia inkhelh hi nuam ka ti êm êm a, he hmun ka thlen tawh hi chuan ka thla a muangin nuam ti takin ka inkhel mai ṭhin, a bik takin Arthur Ashe Stadium hi a nuam.

"Season thum liam ta kha chuan ka tun hun tur hi ka ngaihtuah phak lo a, tennis ka khelh leh pawh hi ka ring tawh lo, mahse tunah chuan duhthusam a thleng dik ve leh ta," a ti. Kum 2018 WTA Finals hnu lamah world number 20 chin a hneh leh vawi khatna a ni hial.

Inkhel dangah Iga Swiatek a chak. Champion lai Swiatek hian Australian player Daria Saville chu 6-3, 6-4 in a hneh a, a match lehpekah chuan Slovenian player Kaja Juvan nen an intum leh ang.

Polish nula Swiatek hian title a kawl lai humhim a tum mek, kum 2012 khan Seren Williams chuan US Open nomawi a kawl lai a lo humhim tawh a, a hnu lamah a zawna champion thei an la awm leh ngai lo.

Swiatek hi a chak chho zel a nih chuan quarterfinal-ah Coco Gauff nen an intawng thei dawn. American tlairawl hian Russian tleirawl Mirra Andreeva chu 6-3, 6-2 a hnehin third round a lo lut ve bawk.

Swiatek leh Gauff te hi champion tura rinkai an ni. US Open inbuatsaihna hnuhnung Cincinnati Open-ah pawh khan nomawi an inchuh a, final inkhel hmuhnawmah Gauff a chak zawk - tun ṭumah hian an intawng leh a nih chuan a hmuhnawm khawp ang.